მექსიკამ დაგმო შეერთებული შტატების შეთავაზება, რომ მან შეიძლება დააწესოს 20%-იანი გადასახადი მექსიკურ იმპორტზე, რითაც პრეზიდენტ დონალდ ტრამპის მიერ დაგეგმილი საზღვრის გასწვრივ კედლის ასაშენებელ თანხას გადაიხდიან.

აღნიშნულ ინფორმაციას BBC ავრცელებს.

მექსიკის საგარეო საქმეთა მინისტრმა, ლუის ვიდეგრეიმ განაცხადა, რომ ამგვარი გადასახადი მექსიკურ იმპორტს შეერთებული შტატების მომხმარებლებისთვის უფრო ძვირადღირებულს გახდის და ისინი კედლის ასაშენებელი თანხის გაღებაზე უარს იტყვიან.

„აშშ-ში მექსიკიდან შეტანილ პროდუქციაზე გადასახადის გაზრდა - ეს არ არის გზა მექსიკას გადაახდევინო კედლის ასაშენებლად თანხა, ეს არის გზა, რომელიც ჩრდილოამერიკელ მომხმარებელს გაუზრდის საფასურს ისეთ პროდუქციაზე, როგორიცაა ავოკადო, სარეცხი მანქანები, ტელევიზორები".

მან ასევე ხაზი გაუსვა, რომ ტრამპის მიერ შეთავაზებული კედლის თანხის გადახდა "მოლაპარაკების საგანს არ წარმოადგენს".

უფრო ადრე, თეთრი სახლის პრესსპიკერმა, შონ სპაისერმა განაცხადა, რომ 20%-იანი გადასახადი წელიწადში, აშშ-სთვის დაახლოებით, 10 მილიარდი დოლარის ოდენობით შემოსავალს მოიტანს.

აშშ-მექსიკის საზღვარზე კედლის აშენება ტრამპის საპრეზიდენტო კამპანიის ერთ-ერთი მთავარი წინადადება იყო. ტრამპი მისი საარჩევნო კამპანიის დროს აცხადებდა, რომ პრეზიდენტად არჩევის შემთხევვაში მექსიკის საზღვარზე ააშენებდა კედელს, უფრო სწორად თავად მექსიკას აიძულებდა მის აშენებას, რომ ქვეყანა არალეგალური ემიგრანტებისაგან, „გამპატიურებელი, მოძალადე“ მექსიკელებისაგან დაეცვა, რაც ტრამპის მხარდამჭერებში დიდ მოწონებას იმსახურებდა. 

დონალდ ტრამპმა აშშ-მექსიკის საზღვრის გასწვრივ 2000 მილზე კედლის აშენების შესახებ ბრძანებას ხელი ორი დღის წინათ მოაწერა. 

მექსიკა არ გადაიხდის დონალდ ტრამპის მიერ გამოცხადებული კედლის აშენების საფასურს, - განაცხადა მექსიკის პრეზიდენტმა, ენრიკე პენა ნიეტომ და დაამატა, რომ „მექსიკას არ სჯერა კედლების". 

ნიეტომ ასევე გააუქმა ვაშინგტონში მომავალ კვირას დადგემილი ვიზიტი მას შემდეგ, რაც დონალდ ტრამპმა კედლის ასაშენებელი თანხის გადაუხდელობის შემთხვევაში, ამის გაკეთება ურჩია.