ევროპული კომისიის პრეზიდენტმა ჟან-კლოდ იუნკერმა იტალიაში ევროკავშირის შესახებ მიმდინარე კონფერენციაზე განაცხადა, რომ „ინგლისური ევროპაში მნიშვნელობას კარგავს“.

„ბრექსიტთან“ დაკავშირებით ბუნდოვანი მოლაპარაკებების გამო, მან თქვა, რომ იგი თავის სიტყვას ფრანგულ ენაზე წარმოთქვამს.

„ნელა, მაგრამ უდაოდ, ინგლისური კარგავს მნიშვნელობას ევროპაში, ასვე იმიტომ, რომ საფრანგეთში არჩევნები ტარდება“, განაცხადა მან ენის შესახებ მისი არჩევანის გაკეთების ახსნისას.

მან დიდი ბრიტანეთის გადაწყვეტილებას, დატოვოს ევროკავშირი, „ტრაგედია“ უწოდა.

BBC-ის ცნობით, მისმა კომენტარმა ინგლისური ენის შესახებ სიცილი და აპლოდისმენტები დაიმსახურა.

„ჩვენ სამართლიანად ვითანამშრომლებთ ჩვენ ბრიტანელ მეგობრებთან, მაგრამ, მოდით, ნუ დაგვავიწყდება, რომ ევროკავშირს არ გადაუწყვეტია დიდი ბრიტანეთის დატოვება, ეს დიდმა ბრიტანეთმა გადაწყვიტა ევროკავშირის დატოვება და ეს წარმოშობს განსხვავებას“, თქვა იუნკერმა.

დიდი ბრიტანეთის პრემიერ მინისტრმა, ტერეზა მეიმ რამდენიმე დღის წინათ ბრალი დასდო ევროკავშირს, რომ იგი ცდილობს 8 ივნისის საპარლამენტო არჩევნების შედეგზე გავლენის მოხდენას.

ბრიუსელი დიდ ბრიტანეთს ბლოკიდან გასვლის სანაცვლოდ 100 მილიარდი ევროს (85 მილიარდი ფუნტი სტერლინგი) გადახდას სთხოვს, რასაც დაუნინგ სტრიტი კატეგორიულად არ ეთანხმება და აცხადებს, რომ ამხელა თანხას ის არც ერთ ვარიანტში არ გადაიხდის.