საფრანგეთში საპრეზიდენტო არჩევნების მე-2 ტური მიმდინარეობს, რომელშიც ერთმანეთს 39 წლის ყოფილი ეკონომიკის მინისტრი, „ცენტრისტი“ ემანუელ მაკრონი და 48 წლის ულტრა-მემარჯვენე ნაციონალისტი მარინ ლე პენი უპირისპირდებიან.

საარჩევნო უბნები საფრანგეთში ადგილობრივი დროით დილის 08:00 საათზე გაიხსნა და საღამოს 07:00 საათზე დაიხურება, ზოგიერთ დიდ ქალაქში კი 20:00 საათზე, რის შემდეგაც, მალევე, არჩევნების პირველადი შედეგების გამოქვეყნებაა მოსალოდნელი.

ორმა კანდიდატმა, რომლებიც 23 აპრილის საპრეზიდენტო არჩევნების პირველ ტურში მონაწილე 11 კანდიდატს შორის საუკეთესო შედეგები აჩვენა, ამომრჩეველს განსხვავებული ხედვები შესთავაზა საფრანგეთის შესახებ.

ლიბერალი ცენტრისტი მაკრონი, ევროკავშირის მტკიცე მხარდამჭერია, მაშინ როცა ლე პენი კამპანიას, „საფრანგეთი უპირველ ყოვლის“ ლოზუნგით და ანტი-იმიგრაციული პროგრამით აწარმოებდა.

ლე პენს სურს საფრანგეთმა უარი თქვას ევროზე და ჩატარდეს რეფერენდუმი საფრანგეთის ევროკავშირში ყოფნასთან დაკავშირებით.

საარჩევნო კამპანიის დახურვამდე ცოტა ხნით ადრე პარასკევს გაუთვალისწინებელი ფაქტი მოხდა. ემანუელ მაკრონის საარჩევნო კამპანიამ განაცხადა, რომ მაკრონი „მასობრივი ჰაკერული თავდასხმის“ სამიზნე გახდა.

მისი კამპანიის თქმით, ონლაინ სივრცეში უამრავი დოკუმენტი გამოქვეყნდა და ნამდვილი და ყალბი ფაილები ერთმანეთშია არეული იმისათვის, რომ ადამიანები დააბნიონ. მათი განცხადებით, ნათელია, რომ არჩევნების მეორე რაუნდის წინ, ჰაკერებს სურთ ძირი გამოუთხარონ მაკრონს.

BBC-ის ცნობით, დოკუმენტები ვებგვერდზე პარასკევს გვიან მაშინ გამოქვეყნდა, როდესაც ოფიციალური საპრეზიდენტო კამპანია დასასრულს უახლოვდებოდა.

მაკრონმა ინტერნეტით გაჟონილი ინფორმაცია კამპანიის ოფიციალურად დახურვამდე რამდენიმე წუთით ადრე დაგმო.

კანდიდატებს და მედიას კვირა საღამომდე, სანამ საარჩევნო უბნები დაიხურება, შეზღუდვები აქვთ დაწესებული, რის გამოც მაკრონმა ვეღარ გაავრცელა დამატებით განცხადებები.

წინასწარი გამოკითხვები აჩვენებდა, რომ ეკონომიკის ყოფილი მინისტრი მის ოპონენტზე, მარინ ლე პენზე 20 პროცენტით და უფრო მეტითაც წინ იყო.