მას შემდეგ რაც ტერეზა მეიმ ხუთშაბათს, 8 ივნისს, გამართულ დიდი ბრიტანეთის რიგგარეშე საპარლამენტო არჩევნებში ვერ შეძლო აბსოლუტური უმრავლესობის მოპოვება, გერმანიის კანცლერმა, ანგელა მერკელმა განაცხადა, რომ იგი ვერ ხედავს ვერავითარ წინააღმდეგობას დაიწყოს მოლაპარაკებები „ბრექსიტთან“ დაკავშირებით მანამდე არსებული გეგმის მიხედვით და დაამატა, რომ ევროკავშირი ამისათვის „მზად არის“.

BBC-ის ცნობით, მერკელმა იმედი გამოთქვა, რომ ბრიტანეთი ამ მოლაპარაკებებში, რომელიც 19 ივნისს უნდა დაიწყოს, კარგ პარტნიორად დარჩება.

ეს მერკელის პირველი კომენტარია, რომელიც მან მას შემდეგ გააკეთა, რაც „კონსერვატიულმა პარტიამ“ არჩევნებში 318 მანდატი მოიპოვა - 2015 წელთან შედარებით 13 ადგილი დაკარგა და თემთა პალატაში აბსოლუტური უმრავლესობის შესაქმნელად 8 ადგილი დააკლდა, რის გამოც ტერეზა მეი კოალიციური მთავრობის ფორმირებას შეუდგა ჩრდილოეთ ირლანდიურ „დემოკრატიული უნიონისტების პარტიასთან“, რომელმაც პარლამენტში 10 დეპუტატი გაიყვანა, ერთობლივად კი მათ და „ტორებს“ 328 ადგილი ერგებათ (318+10), რაც უმრავლესობისთვის საჭირო 326 მანდატზე 2-ით მეტია.

მერკელმა, რომელიც მეხიკოში მექსკის პრეზიდენტს ენრიკე პენა ნიეტოს ვაჭრობის საკითხების განსახილველად ხვდება, ჟურნალისტებს პარასკევს შემდეგი უთხრა: „მე ვფიქრობ, რომ ბრიტანეთს, იქედან გამომდინარე რაც დღეს მე მოვისმინე პრემიერ მინისტრისაგან, უნდა, რომ დარჩეს ერთგული მისი მოლაპარაკებების გეგმისადმი.

„ჩვენ გვურს მოლაპარაკებების სწრაფად წარმართვა. ჩვენ გვსურს ერთგული ვიყოთ იმ გეგმისადმი, რაც შედგენილია. ამგვარად, ამ ეტაპზე მე არ ვფიქრობ, რომ ისეთ რამეს ჰქონდეს ადგილი, რომელიც გვაფიქრებინებდეს, რომ მოლაპარაკებები არ დაიწყოს შეთანხმების შესაბამისად“.

მერკელმა განაგრძო და იმედი გამოთქვა, რომ დიდი ბრიტანეთი კარგ პარტნიორად დარჩება.

„ბრიტანეთი ევროპის ნაწილია, მიუხედავად იმისა, რომ იგი უკვე აღარ იქნება ევროკავშირის ნაწილი“, განაცხადა გერმანიის კანცლერმა.