ამერიკელი სტუდენტი, რომელიც ჩრდილოეთ კორეაში 17 თვის განმავლობაში იყო დაპატიმრებული, ორშაბათს ცინცინატის საავადმყოფოში გარდაიცვალა. ინფორმაცია აღნიშნულის შესახებ მისმა მშობლებმა გაავრცელეს. კომურ მდგომარეობაში მყოფი ოტო უომბიერი ფხენიანმა სულ რამდენიმე დღის წინათ გაათავისუფლა პატიმრობიდან

22 წლის ოტო უომბიერის ჯანმრთელობის მდგომარეობა ექიმებმა გასულ კვირას შეაფასეს და განაცხადეს, რომ მას ტვინის მძლავრი დაზიანება ჰქონდა მიღებული.

„სამწუხაროდ, საშინელმა, არასათანადო მოპყრობამ, რომელსაც ჩვენი შვილი იღებდა ჩრდილო კორეელების ხელში, განაპირობა იმ სამწუხარო შედეგის დადგომა, რაც მოსალოდნელი იყო რომ დადგებოდა და რასაც ჩვენ დღეს განვიცდით“, განაცხადა ოჯახმა უომბიერის გარდაცვალების შემდეგ, ადგილობრივი დროით 14:20 საათზე.

ოჯახის თქმით, თავიანთი შვილი კომაში 2016 წლის მარტში ჩავარდა, მალევე რაც მას 15 წლიანი პატიმრობა მიუსაჯეს, რაც ჩრდილო კორეის შრომა-გასწორების კოლონიაში მკაცრი რეჟიმით სასჯელის მოხდას ითვალისწინებდა.

ცინცინატის სამედიცინო ცენტრში, სადაც ის გარდაიცვალა, ექიმებმა გასულ ხუთშაბათს განაცხადეს, რომ უომბიერი ვერ ცნობდა მის გარშემომყოფთ, არ ესმოდა ენა, არ ჰქონდა „წინასწარ განზრახული მოძრაობები და ქცევები“, თუმცა კი თავისით სუნთქავდა.

ოჯახს მისი სიკვდილის მიზეზი ჯერ არ დაუსახელებია.

როგორც „როიტერსი“ წერს, ამერიკელი სტუდენტის დაპატიმრების გარემოებები და ის, თუ რა სამედიცინო მკურნალობას იღებდა იგი ჩრდილო კორეაში საიდუმლოდ რჩება, მაგრამ ნათესავების თქმით, მისი მდგომარეობა მიუთითებდა, რომ მას ფიზიკურ შეურაცხყოფას აყენებდნენ მისი დამატყვევებლები.

21 წლის ოტო უომბიერი ჩრდილო კორეაში 2016 წლის იანვარში ტურისტული ვიზიტისას სასტუმროდან პროპაგანდის ნიშნის მოპარვის მცდელობისთვის დააპატიმრეს, მარტში კი გაასამართლეს და 15-წლიანი პატიმრობა მიუსაჯეს.

ფხენიანმა იგი გასულ კვირას გაათავისუფლა პატიმრობიდან და განაცხადა, რომ გადაწყვეტილება „ჰუმანურ საფუძვლებზე“ იქნა მიღებული. მის გათავისუფლებას წინ უძღოდა ამერიკის სახელმწიფო დეპარტამენტის საგანგებო დესპანის ფხენიანში ვიზიტი, რომელმაც მოითხოვა ჰუმანურ საფუძვლებზე უომბიერის გათავისუფლება.

უომბიერის გარდაცვალების გამო განცხადება გააკეთა პრეზიდენტმა დონალ ტრამპმა. მან სამძიმარი გამოუცხადა გარდაცვლილის ოჯახს და გაკიცხა „ჩრდილოეთ კორეის რეჟიმის სიმხეცე, მაშინ როცა ჩვენ მის ბოლო მსხვერპლს ვგლოვობთ“.