შეერთებული შტატების პრეზიდენტი დონალდ ტრამპი მისი და სახელმწიფო მდივნის, რექს ტილერსონის IQ-ს ტესტების შედარებაზე აკეთებს მინიშნებას მას შემდეგ, რაც მათ შორის უთანხმოების ნიშნები გამოიკვეთა.

როგორც BBC იუწყება, მან აღნიშნულის შესახებ ჟურნალთან ინტერვიუში განაცხადა, როდესაც სთხოვეს გავრცელებული ინფორმაციის კომენტირება, რომ თითქოს ტილერსონმა მას „დებილი“ უწოდა.

„მე ვფიქრობ, ეს ყალბი ახალი ამბავია“, უთხრა მან „ფორბსს“, „მაგრამ თუკი მან ეს თქვა, ვფიქრობ ჩვენ უნდა შევადაროთ IQ-ს ტესტები და მე გეტყვით თქვენ, თუ ვინ გაიმარჯვებს“.

ტრამპს სამშაბათს ტილერსონთან ლანჩი ექნება.

სახელმწიფო მდივანმა, რექს ტილერსონმა 4 ოქტომბერს განაცხადა, რომ იგი არასოდეს განიხილავდა მისი თანამდებობის დატოვებას და დაადასტურა მისი ერთგულება პრეზიდენტ ტრამპის დღის წესრიგისადმი.

ტილერსონმა NBC-ის ახალი ამბების მიერ გავრცელებულ ინფორმაციას უპასუხა იმის შესახებ, რომ თითქოს ვიცე-პრეზიდენტ მაიკ პენსს უნდა გადაეთქმევინებინა მისთვის გადადგომა, რომლის შესახებ გადაწყვეტილებაც მან ამ ზაფხულზე ბოისკაუტების შეკრებაზე ტრამპის უაღრესად პოლიტიზებულ სიტყვის გამო მიიღო. ტილერსონი ორგანიზაციის ყოფილი ეროვნული პრეზიდენტია.

NBC-მ ასევე განაცხადა, რომ სიტყვის შემდეგ ტილერსონმა ტრამპს „დებილი“ უწოდა.

„ვიცე-პრეზიდენტს არასოდეს დასჭირვებია ჩემი დარწმუნება იმაში, რომ დავრჩენილიყავი სახელმწიფო მდივნის პოსტზე, რადგან მე არასოდეს განმიხილავს ამ თანამდებობის დატოვება“, განაცხადა ტილერსონმა.

როდესაც მას ჰკითხეს, უწოდა თუ არა მან პრეზიდენტს „დებილი“, ტილერსონს არ მოუხდენია ამის უარყოფა. მან განაცხადა: „მე ამგვარი წვრილმანი რაღაცების განხილვას არ ვაპირებ“.

ტილერსონის განცხადების შემდეგ CNN-მა გადმოსცა, რომ მან თავისის წყაროების მეშვეობით დადასტურებული ინფორმაცია მიიღო, რომ ზუსტი ფრაზა რაც სახელმწიფო მდივანმა გამოიყენა “f***ing moron“-ი იყო (მოტყ....ი დებილი).

სექტემბრის ბოლოს, მას შემდეგ რაც ტილერსონმა ინტერვიუში გაამჟღავნა, რომ შეერთებული შტატები ჩრდილოეთ კორეასთან საიდუმლო კომუნიკაციის დამყარებას ცდილობდა, ტრამპმა „თვითერზე“ დაწერა, რომ მისი „ჩინებული“ სახელმწიფო მდივანი ფხენიანთან საუბრით დროს ტყუილუბრალოდ კარგავდა.