მინისტრთა კაბინეტში განხორციელებულ საკადრო ცვლილებას პოლიტიკური პლატფორმა „ახალი საქართველოს" თავმჯდომარე პრემიერ მინისტრის დასასრულის დასაწყისს უწოდებს.

გიორგი ვაშაძე მიიჩნევს, რომ „ქართულ ოცნებაში" შიდა დაპირისპირებაა და მიუხედავად იმისა, რომ რეგიონული განვითარებისა და ინფრასტრუქტურის უკვე ყოფილი მინისტრი ზურაბ ალავიძე „პირდად კვირიკაშვილის თანაგუნდელი" იყო, მთავრობის მეთაურმა ამ დაპირისპირების პროცესს შესწირა, როგორც თანაგუნდელებიდან ყველაზე ნაკლებად ახლობელი ადამიანი.

„ეს არის კვირიკაშვილის დასასრულის დასაწყისი იმიტომ, რომ ალავიძე იყო პირდად მისი თანაგუნდელი და როგორც ჩანს, იმ თანაგუნდელებს შორის, რომლებიც მთავრობაში ჰყავს, ყველაზე ნაკლებად ახლობელი ადამიანი შეწირა ამ პროცესს. ეს ცალსახად მისი დასასრულის დასაწყისია. მეორე, რაზეც ეს მიუთითებს, ის არის, რომ „ქართულ ოცნებაში" ძალიან დიდი დაპირისპირებაა და შესაბამისად, ბრძოლაა ძალაუფლებებისთვის - ვინ რა თემას გააკონტროლებს, ვინ სად მეტ ფულს იშოვის და ა.შ. მთავრობის მთავარი პრობლემა არის პირადად კვირიკაშვილი, რომელიც კაბინეტშია ჩაკეტილი. ბრეჟნევს ადარებენ ამ ადამიანს და მე არ ვარ იმ პერიოდში ნაცხოვრები, მაგრამ რაც წამიკითხავს, დაახლოებით, ასეთი უძრაობის ხანაა, რომელიც ლპობისკენ მიდის", განაცხადა გიორგი ვაშაძემ.

საქართველოს პრემიერ მინისტრმა მინისტრთა კაბინეტში საკადრო ცვლილების შესახებ დღეს განაცხადა. ინფრასტრუქტურის მინისტრის პროსტზე ზურაბ ალავიძეს მაია ცქიტიშვილი შეცვლის.