ივანიშვილს უნდა ჩემი ხილვა ქართულ მიწაში, მაგრამ ის მიხილავს მე ქართულ მიწაზე, როგორც ცეცხლის ეშინია, ისე ეშინია ჩემი საქართველოში ჩამოსვლის, განაცხადა მიხეილ სააკაშვილმა გადაცემა „განსხვავებულ აქცენტებში“ პირდაპირი ჩართვისას.

სააკაშვილს არაფერი უთქვამს მისი, როგორც უშუალო ლიდერის როლზე ქართულ პოლიტიკაში და არც დაბრუნების კონკრეტულ თარიღზე, თუმცა ყოფილმა პრეზიდენტმა ხაზგასმით აღნიშნა, რომ ძველი სახეები არ უნდა დაბრუნდნენ პოლიტიკაში და უნდა მოვიდეს „ახალი ხალხი“ და „ახალი პრემიერი“ და ეს უნდა მოხდეს საპრეზიდენტო არჩევნების კვალდაკვალ.

მანამდე კი მან მწვავედ გააკრიტიკა საქართველოს ყოფილი პრემიერ მინისტრი ბიძინა ივანიშვილი, რომელიც მისი თქმით, საპრეზიდენტო კანდიდატურად საკუთარი თავის წამოყენებას გეგმავს, რათა ამით იმუნიტეტი შეიძინოს იმ საფრთხეებიდან გამომდინარე, რაც საფრანგეთში მისი სისხლის სამართლებრივი დევნის პერსპექტივით არის განპირობებული.