ეკონომიკისა და მდგრადი განვითარების მინისტრი, ხორავას ქუჩაზე მომხდარი მკვლელობის საქმეზე მტკიცებულებების გაყალბების თაობაზე, გაზეთ „ქრონიკა +"-ის მთავარი რედაქტორის მიერ მისი მისამართით გამოთქმულ ბრალდებებს სიბინძურეს უწოდებს.

როგორც დიმიტრი ქუმსიშვილმა ჟურნალისტებთან საუბრისას აღნიშნა, ხორავას ქუჩის ტრაგედიასთან შეხება არ ჰქონია.

„ადამიანს დააბრალო დაუბრალებელი, მე აი, არც კი წარმომიდგენია რამდენად ბინძური გონება უნდა გქონდეს.

რა თქმა უნდა, არანაირი შეხება არ მაქვს, ვერ მექნება და არც არასდროს მქონია ამ ტრაგედიასთან და რა თქმა უნდა, ეს სიბინძურე, რომელიც ელისო კილაძემ დაწერა, არის უაღრესად დიდი სიბინძურე, რომელსაც არანაირი ზღვარი არ აქვს. აი, ფანტაზიის ზღვარი არ აქვს ამ სიბინძურეს, რომელიც ელისო კილაძემ მე დამაბრალა", განაცხადა დიმიტრი ქუმსიშვილმა.

გაზეთ „ქრონიკა +"-ის მთავარი რედაქტორი ელისო კილაძე ცხადებს, რომ თბილისში, ხორავას ქუჩაზე მომხდარი მკვლელობის საქმეში სამხარაულის ექსპერტიზის ეროვნული ბიუროს დასკვნა გაყალბებულია.

კილაძე, საკუთარ წყაროზე დაყრდნობით, ავრცელებს ინფორმაციას, რომლის მიხედვითაც, ექსპერტიზის დასკვნის გაყალბება ეკონომიკისა და მდგრადი განვითარების მინისტრის დავალებითა და ესპერტიზის ეროვნული ბიუროს ხელმძღვანელის, გოგა თვაურის, რომელიც დიმიტრი ქუმსიშვილის ახლობელია, უშუალო მონაწილეობით მოხდა.

გაზეთ „ქრონიკა +"-ის მთავარი რედაქტორი აცხადებს, რომ ეკონომიკის მინისტრის ინტერესი იყო, პრობლემები შექმნოდა ირაკლი შოთაძეს, რადგან შოთაძე იყო იმ საგამოძიებო ჯგუფის ხელმძღვანელი, რომელიც ქუმსიშვილის, კვირიკაშვილის და ალავიძის კორუფციულ სქემებს იძიებს.