იუსტიციის უმაღლესი საბჭოს არამოსამართლე წევრი ნაზი ჯანეზაშვილი „საერთაშორისო გამჭვირვალობა - საქართველოს“ მიერ სასამართლო სისტემაში არსებული კორუფციული რისკების შესახებ გამოქვეყნებულ კვლევასთან დაკავშირებით საუბრობს და აცხადებს, რომ საგამოძიებო ორგანოები უნდა დაინტერესდნენ, მიაქციონ ძალიან სერიოზული ყურადღება, რომ რაღაც „გავლენიანი ჯგუფის“ წევრებმა არ მართონ სასამართლო სისტემა.

„ამის შესახებ მე მაქვს უამრავი ინფორმაცია, მაგრამ სამწუხაროდ კორუფციას ვერ შეისწავლის ვერავინ, გარდა საგამოძიებო ორგანოსი. არავის არ შეუძლია, არავის არ შესწევს ძალა, რომ შეისწავლოს, დეტალურად დადოს დასკვნა, რომ კორუფცია ნამდვილად არსებობს. საგამოძიებო ორგანოები უნდა დაინტერესდნენ, მიაქციონ ძალიან სერიოზული ყურადღება, რადგან ამის გარეშე ჩვენ ბუნებრივია, არ მივიღებთ მხოლოდ იმას, რომ ვიღაცა ჯგუფს აქვს ძალაუფლება და ის ამით უბრალოდ ნებივრობს და უბრალოდ თავის ინტერესებს ატარებს, მაგრამ აქ უკვე ჩნდება ძალიან სერიოზული ინტერესები და ძალიან სერიოზული რისკები“, განაცხადა ჯანეზაშვილმა.