„ქართული ოცნების“ ერთ-ერთ საპრეზიდენტო კანდიდატად რეგიონული განვითარებისა და ინფრასტრუქტურის მინისტრი მაია ცქიტიშვილი სახელდება, რაც ორშაბათს, პარლამენტის თავმჯდომარემ, ირაკლი კობახიძემაც დაადასტურა, თუმცა ცქიტიშვილი ერთ-ერთია მათ შორის, ვისზეც მმართველ გუნდში, როგორც შესაძლო კანდიდატზე მსჯელობენ და პარტიის ლიდერების თქმით, საუბარი ასევე სხვა კანდიდატურებზეც მიდის და პოლიტიკური საბჭო გადაწყვეტილებამდე მიმდინარე კვირის ბოლომდე უნდა მივიდეს.

„საპრეზიდენტო კანდიდატურასათან დაკავშირებით არაერთხელ გაკეთდა უკვე კომენტარები. გუნდში იქნება კონსულტაციები და თქვენ გაიგებთ ამის თაობაზე, ისევე როგორც ჩვენი მოსახლეობა“, უთხრა ჟურნალისტებს მაია ცქიტიშვილმა და უპასუხოდ დატოვა შეკითხვა, იქნება თუ არა თავად „ქართული ოცნების“ საპრეზიდენტო კანდიდატი.

გიორგი ვოლსკიმ კი დაადასტურა, რომ „ქართულ ოცნებას“ 2018 წლის საპრეზიდენტო არჩევნებში თავისი კანდიდატი ეყოლება.