საპარლამენტო უმრავლესობის ლიდერმა, არჩილ თალაკვაძემ „ქართული ოცნების“ საპრეზიდენტო კანდიდატის დასახელებასთან დაკავშირებით კომენტარი გააკეთა და იმედი გამოხატა, რომ პარტიის თავმჯდომარის, ბიძინა ივანიშვილის მიერ გუშინდელ ინტერვიუში დაფიქსირებული პოზიციის შემდეგ, „კიდევ უფრო გაიზრდება ინტერესი, რომ დამოუკიდებელმა კანდიდატებმა მიიღონ მონაწილეობა არჩევნებში“.

თალაკვაძემ ამავე დროს აღნიშნა, რომ გუნდში არაერთი ადამიანია, რომელსაც შეუძლია არჩევნების მოგება.

მისი თქმით, მიუხედავად იმისა, რომ საზოგადოების დიდ ნაწილს ბიძინა ივანიშვილის კანდიდატურის ხილვა სურს, ივანიშვილს ამის ინტერესი არ გააჩნია.

უმრავლესობის ლიდერმა დაამატა, რომ ჯერჯერობით კანდიდატი არ არჩეულა და ამის შესახებ უახლოეს პერიოდში მიაწვდიან საზოგადოებას ინფორმაციას.

„რამდენიმე დღეში  ჩვენი პოზიცია საპრეზიდენტო არჩევნებთან დაკავშირებით უკვე ცნობილი იქნება. როგორც გითხარით, გუნდში არაერთი ადამიანია, რომელსაც შეუძლია არჩევნების მოგება, თუ ჩაერთვება საპრეზიდენტო კამპანიაში. შემიძლია გითხრათ გვარებიც. ესენია დავით სერგეენკო, სოზარ სუბარი, გიორგი კახიანი და, რა თქმა უნდა, საზოგადოებაში არის დიდი სურვილი, რომ თავად ბატონმა ბიძინა ივანიშვილმა მიიღოს ამ საპრეზიდენტო არჩევნებში მონაწილეობა. თუმცა, ჩვენთვის ცნობილია მისი პოზიცია. მას არ აქვს სურვილი, რომ ეს არჩეული თანამდებობის დაიკავოს. იმ პოზიციის შემდეგ, რომელიც გუშინ პარტიის თავმჯდომარემ დააფიქსირა, ვფიქრობ, კიდევ უფრო გაიზრდება ინტერესი, რომ დამოუკიდებელმა კანდიდატებმა მიიღონ მონაწილეობა არჩევნებში. ჩვენი პოზიციის შესახებ უმოკლეს დროში გაცნობებთ“, განაცხადა საპარლამენტო უმრავლესობის ლიდერმა, არჩილ თალაკვაძემ.