„ევროპული საქართველოს“ დეპუტატი ირმა ნადირაშვილი „ერთიანი ნაციონალური მოძრაობის“ და სხვა ოპოზიციური პარტიების საპრეზიდენტო კანდიდატის, გრიგოლ ვაშაძის უპასუხისმგებლობაზე საუბრობს და ამბობს, რომ „საერთო პოლიტიკური წარსულისკენ ხელის გაშვერა და ტალახის სროლა, არის უღირსი საქციელი“.

„გრიგოლ ვაშაძემ დაარღვია ის შეთანხმება, რომელიც იყო ხელმოწერილი და ითვალისწინებდა თავდაუსხმელობას ოპოზიციურ პარტიებს შორის. შეთანხმება არ სჭირდება იმის ცოდნას, რომ საერთო პოლიტიკური წარსულისკენ ხელის გაშვერა და ტალახის სროლა, არის უღირსი საქციელი. სამწუხაროდ, გრიგოლ ვაშაძე აღმოჩნდა უპასუხისმგებლო ადამიანი. ის ვერ ხვდება, რომ ასეთი საქციელით „ქართული ოცნების“ წისქვილზე ასხამს წყალს. ოპოზიციის შიგნით დაძაბულობა, ურთიერთავდასხმები ეს არის „ქართული ოცნების“ თამაშში ჩართვა”, განაცხადა ირმა ნადირაშვილმა.

პოლიტიკური გაერთიანება „ძალა ერთობაშია“ საპრეზიდენტო კანდიდატმა გრიგოლ ვაშაძემ კახეთში, ამომრჩეველთან შეხვედრისას „ერთიანი ნაციონალური მოძრაობის“ ყოფილი წევრები, დღევანდელი „ევროპული საქართველოს“ ლიდერები მწვავედ გააკრიტიკა და თქვა, რომ ამომრჩეველს არ დაავიწყდება ის „უბედურება, შეცდომები და დანაშაული“, რაც დავით ბაქრაძის თანაპარტიელებმა ჩაიდინეს.