პოლიტიკური გაერთიანება „ძალა ერთობაშია“ საპრეზიდენტო კანდიდატმა გრიგოლ ვაშაძემ კახეთში, ამომრჩეველთან შეხვედრისას „ერთიანი ნაციონალური მოძრაობის“ ყოფილი წევრები, დღევანდელი „ევროპული საქართველოს“ ლიდერები მწვავედ გააკრიტიკა და თქვა, რომ ამომრჩეველს არ დაავიწყდება ის „უბედურება, შეცდომები და დანაშაული“, რაც დავით ბაქრაძის თანაპარტიელებმა ჩაიდინეს.

„შარშან ადგილობრივ არჩევნებში მომიწია მონაწილეობის მიღება ქუთაისში. იმდენი ფული დახარჯეს, ისე გააყალბეს, მაგრამ ამ, არც ვიცი რა ვუთხრა, ახლა ძალიან „ევროპულ საქართველოს“ რომ ეძახიან თავის თავს ხომ, ყველაფერი უბედურება რომ მაგათი გაკეთებული არის და მერე ახლა გავიდნენ პარტიიდან და ჰგონიათ, რომ ხალხს დაავიწყდება ეს უბედურება ვისი გაკეთებული იყო, ეს შეცდომები და დანაშაული. ეგენი და „ქართული ოცნება“ - მაგათმა ფული დახარჯეს?, მაინც ვერ აიცილეს თავიდან მეორე ტური. უბრალოდ ისე გააყალბეს, რომ ამ კლოუნადაში, მეორე ტურში მონაწილეობა იყო შეუძლებელი“, უთხრა ვაშაძემ ამომრჩევლებს.

მანვე მოუწოდა მოსახლეობას, რომ ყველანი მივიდნენ საარჩევნო უბნებზე და თავისუფლად გამოხატონ თავიანთი პოზიცია.

„ხელი ჩაავლეთ სხვებსაც რაა, კაცებს, ქალებს... აი, ყველა თუ მოვა საარჩევნო უბანზე, ამათი დამარცხება არის აბსოლუტურად... ყველას უთხარით, ნუ ეშინიათ, არც კამერები დგას იმ უბნებზე, ტყუილად აშინებენ ხალხს. არც კამერები დგას, ვინც გინდათ, ის შემოხაზეთ“, უთხრა ვაშაძემ ხოდაშენის მცხოვრებლებს.