„ქართული ოცნების“ წევრი და პარლამენტის იურიდიულ საკითხთა კომიტეტის თავმჯდომარე ეკა ბესელია ფოტოს ეხმაურება, რომელზეც ქართველ მოჭიდავეებს რუსეთის დროშის ფერებში გადაწყვეტილი მაისურები აცვიათ და რომელზეც ოკუპირებული „სამხრეთ ოსეთის“ ე.წ. დეპუტატი და რუსეთის ნაკრების მთავარი მწვრთნელი, ძამბოლატ თედეევია გამოსახული.

ბესელია აცხადებს, რომ გასაკვირი არ არის, რომ ამას გარკვეული ემოციური შეფასებები მოჰყვა, იმიტომ რომ ოკუპირებული ტერიტორიები ეს არის ყველაზე მტკივნეული თემა მოსახლეობისთვის და როცა საკითხი ამ თემას ეხება, დიდი სიფრთხილეა საჭირო.

„რა თქმა უნდა, არ იყო ეს სასიამოვნო და გარკვეული ემოციური შეფასებები, ამას ბუნებრივია მოჰყვა და ესეც აბსოლუტურად გასაგებია. მე მგონი განსაკუთრებით არის საჭირო ასეთი საკითხების მიმართ მეტი სიფრთხილის გამოჩენა და მეტად გააზრება, როცა ქვეყანას აქვს ოკუპირებული ტერიტორიები და ჩვენთვის ძალიან მტკივნეული და ძალიან ემოციურია ეს თემები, ძალიან საფრთხილოა ასეთი საკითხები, იმიტომ რომ მეტი ყურადღება სჭირდება“, განაცხადა ეკა ბესელიამ.