პარლამენტის პირველი ვიცე-სპიკერი თამარ ჩუგოშვილი დამოუკიდებელი ექსპერტის, ნონა მიხელიძის მიერ წარდგენილ ანგარიშს ევროპარლამენტში მიკერძოებულს და არაკომპეტენტურს უწოდებს. ჩუგოშვილი მიიჩნევს, რომ როდესაც რისკი ჩნდება, რომ ევროპარლამენტი არაკომპეტენტურ ანგარიშს დაეყრდნოს, ეს არ უნდა დაუშვან და ევროპარლამენტს სწორი ინფორმაცია უნდა მიაწოდონ.

„ევროკომისარსაც აქვს თავისი მოსაზრებები, საკითხს უფრო დეტალურად ბრიუსელში დაბრუნების შემდეგ გაეცნობა. ნამდვილად ცალმხრივი და კომპეტენტურობას მოკლებული ანგარიშია. არ ვიცი, თავად რაზე საუბრობს, მაგრამ ევროკომისარმაც ახსენა, რომ გარკვეული ინფორმაცია აქვს, რომ მათ მიერ შექმნილ დოკუმენტზე პრობლემა იყო. საქართველოს თაობაზე კომუნიკაცია ყოველთვის არის, მით უმეტეს, როცა შეიძლება ნებისმიერი ანგარიში იყოს შემდეგ გამოყენებულ რეზოლუციებსა და ოფიციალურ დოკუმენტებში. როცა დოკუმენტის წყარო არაკომპოტენტურია, ბუნებრივია, ჩვენს ევროპელ კოლეგებს ინფორმაციას ვაწვდით და ვეუბნებით, რომ ან ფაქტობრივი შეცდომებია დაშვებული, ან არასწორი შეფასებებია გაკეთებული. ეს ჩვენი მოვალეობაა, როგორც პარლამენტის წევრებისა და საქართველოს წარმომადგენლების.

როცა ანგარიშში არასწორი ფაქტი წერია, მასზე პარლამენტმა ევროპარლამენტს სწორი ინფორმაცია უნდა მიაწოდოს. პარლამენტის წევრების ვალდებულებაა, ევროპარლამენტის შეცდომაში შეყვანა არ დავუშვათ, მათ სწორი ინფორმაცია მივაწოდოთ და ამას რომ არ ვაკეთებდეთ, ამაზე უნდა გვაკრიტიკებდეთ და არა – პირიქით“, განაცხადა თამარ ჩუგოშვილმა.