შინაგან საქმეთა სამინისტრო თორნიკე მერებაშვილის გარდაცვალების საქმეზე სპეციალურ განცხადებას ავრცელებს. განცხადებაში წერია, რომ მერებაშვილი გარდაცვალების ზუსტი მიზეზი ჯერ დადგენილი არ არის, მაგრამ გამოძიების მიერ ჩატარებული პირველადი პროცედურებიდან ირკვევა, რომ გორის მუნიციპალიტეტის სოფელ ხელთუბანის მიმდებარე  ტერიტორიაზე თორნიკე მერებაშვილს „მერსედესის“ მარკის მიკროავტობუსი დაეჯახა. განცხადებაში ასევე წერია, რომ საქმეზე ამ დროისთვის დაკითხულია 137 პირი.

„შინაგან საქმეთა სამინისტროს შიდა ქართლის პოლიციის დეპარტამენტი 1999 წელს დაბადებული თ.მ.-ს გარდაცვალების ფაქტთან დაკავშირებით გამოძიებას საქართველოს სსკ-ს 117-ე მუხლის 1-ლი ნაწილით და 276-ე მუხლის მე-5 ნაწილით აწარმოებს, რაც გულისხმობს ჯანმრთელობის განზრახ მძიმე დაზიანებას და ტრანსპორტის მოძრაობის უსაფრთხოების ან ექსპლოატაციის წესის დარღვევას, რამაც ადამიანის სიცოცხლის მოსპობა გამოიწვია.

გამოძიების პირველადი ინფორმაციით, მიმდინარე წლის 6 ივლისს გორის მუნიციპალიტეტის სოფელ ხელთუბნის მიმდებარე ტერიტორიაზე, საავტომობილო გზაზე მყოფ 1999 წელს დაბადებულ თ.მ.-ს შეეჯახა ამავე გზაზე მოძრავი „მერსედესის“ მარკის მიკროავტობუსი, რის შედეგადაც თ.მ. საავადმყოფოში მიყვანამდე გარდაიცვალა.

საქმეზე მიმდინარე გამოძიების ფარგლებში ხორციელდება კომპლექსური საგამოძიებო მოქმედებები, მათ შორის, ამოღებულია შემთხვევის ადგილის მიმდებარე ტერიტორიაზე არსებული ვიდეოსათვალთვალო კამერის ჩანაწერი, გამოკითხული 137 პირი. თ.მ.-ს გარდაცვალების ზუსტი მიზეზების დასადგენად, კერძოდ, იყო თუ არა პიროვნების სიკვდილი გამოწვეული ავტოსატრანსპორტო საშუალების შეჯახებით ან რაიმე სხვა გარემოებით, დანიშნულია ყველა შესაბამისი და კომპლექსური სამედიცინო ექსპერტიზა“ წერია განცხადებაში, რომელსაც შინაგან საქმეთა სამინისტრო ავრცელებს.

თორნიკე მერებაშვილის ოჯახი ამ დროისთვის აქციას მართავს. ცოტა ხნის წინ, აქციის მონაწილეებს გადაკეტილი ჰქონდათ ავტობანი, თუმცა გახსნეს და მერიის შენობასთან გადაინაცვლეს.