ხორავას ქუჩაზე მოკლული ერთ-ერთი არასრულწლოვნის, დავით სარალიძის მამა ზაზა სარალიძე პარლამენტის თავმჯდომარის, ირაკლი კობახიძის განცხადებას, რომ შვილმოკლული მამების აქცია, „ნაციონალების“ აქციაა, უმდაბლესი ადამიანის განცხადებას უწოდებს.

სარალიძის თქმით, „შვილების მამა ასეთ განცხადებებს არ უნდა აკეთებდეს".

„პირისპირ მოვიდეს, პირისპირ შემხვდეს თუ აქვს მაგის კაცობა, დავსხდეთ და ვისაუბროთ ნებისმიერ თემაზე და მაშინ იქნებ მივახვედრო მართლა ეგ ნაძირალა, რომ არავითარი „ნაციონალები", არავითარი „ოცნება", არავითარი „ლეიბორისტები" და არავინ არ მაინტერესებს ჩემი შვილის მკვლელებისა და ხელის დამფარებლების მეტი. მაგრამ, ამ ნაძირლებს ამას, ალბათ, ვერ შევასმენ. მე ასე ვფიქრობ, რომ კობახიძეს, ალბათ, იმაშიც ეპარება ეჭვი, რომ ჩემი შვილი საფლავში წევს. იქნებ, ამოვიდეს საფლავზე და ამოვთხაროთ ერთად და ვანახებ და იქნებ, დარწმუნდეს, რომ მოკლულია ჩემი შვილი. ალბათ, ამაშიც ეჭვი ეპარება, თორე შვილების მამა ასეთ განცხადებებს არ უნდა აკეთებდეს. ან, ან ძალიან მოქცეულია ბატონი სუბელიანისა და მისი ოჯახის წევრების გავლენის ქვეშ, ან ძალიან დიდი ფული აქვს აღებული და უნდა თქვას ეს ასე. ყოველ შემთხვევაში, ეს იყო ყველაზე უმდაბლესი ადამიანის განაცხადი", აღნიშნა ზაზა სარალიძემ „რეაქციაში" სატელეფონო ჩართვისას.