ჭიათურისა და საჩხერის ეპარქიის მიტროპოლიტის განცხადებას შეწყალების კომისიის ყოფილი თავმჯდომარე პასუხობს. მეუფე დანიელის განცხადებაზე, რომ ყოფილი პრეზიდენტი გიორგი მარგველაშვილი დეკანოზ გიორგი მამალაძის „შეწყალებას აპირებდა“, რასაც „ეკლესია მიესალმებოდა“, მაგრამ „ხელისუფლებამ შეიკავა თავი“, ზვიად ქორიძე ამბობს, რომ აღნიშნულ საკითხზე თავად კომისიის წევრები ვერ შეთანხმდნენ, მთავრობასთან კონსულტაციების შესახებ კი, ყოფილ პრეზიდენტს მინიშნება არასდროს გაუკეთებია.

„მაშინ პირადად ჩემი ინიციტივით განსაკუთრებული გარემოებით კომისიის სხდომაზე გავიტანეთ ეს საქმე. დებულება, როგორც ითვალისწინებდა, რომ კომისიის ყველა წევრს დადებითი პასუხი უნდა გაეცა, ანუ კონსესუსით მიგვეღო გადაწყვეტილება, რომ პრეზიდენტისთვის შეგვეთავაზებინა რეკომენდაცია, ვერ მოხერხდა იმ ეტაპზე.

მაშინ პრეზიდენტმა გაიზიარა კომისიის ეს დამოკიდებულება და მას შეწყალების ექსკლუზიური უფლება არ გამოუყენებია. მე ძალიან ბევრჯერ მქონდა საუბარი ამაზე მარგველაშვილთან და არასოდეს ამ საუბრის დროს არ ყოფილა რაიმე მინიშნებაც კი, რომ მთავრობასთან ამ თემაზე მიდიოდა კონსულტაციები", აცხადებს ზვიად ქორიძე „რუსთავი 2"-თან საუბრისას.

ჭიათურისა და საჩხერის მიტროპოლიტმა, განცხადება, რომ მარგველაშვილი დეკანოზ გიორგი მამალაძის „შეწყალებას აპირებდა“, რასაც „ეკლესია მიესალმებოდა“, მაგრამ „ხელისუფლებამ შეიკავა თავი", დღეს გააკეთა.