ჩრდილოეთ კორეის ლიდერი კიმ ჩენ ინი შეერთებული შტატების პრეზიდენტთან, დონალდ ტრამპთან შესახვედრად ვიეტნამში ჩავიდა.

კიმის მწვანე და ყვითელი მატარებელი დონგ დანგის სადგურზე გაჩერდა, საიდანაც იგი დედაქალაქ ჰანოისკენ ავტომანქანით გაემგზავრა.

რკინიგზის სადგურზე კიმ ჩენ ინის დახვედრის ოფიციალური ცერემონია გაიმართა. წთელი ხალიჩის გასწვრივ მას ხალხი დროშების ფრიალით დახვდა.

მატარებლიდან ავტომანქანისკენ მიმავალი კიმ ჩენ ინი დაცვის წევრებით, ოფიციალური პირებით და ტელეოპერატორებით იყო გარშემორტყმული.

კიმ ჩენ ინი ვიეტნამში თავის დასთან, კიმ იო ჩონთან და ასევე მთავარ მომლაპარაკებელთან, ყოფილ გენერალ კიმ ჩენ ჩოლთან ერთად ჩავიდა.

ფხენიანიდან ვიეტნამამდე მატარებელმა დაახლოებით 4 000 კმ გაიარა და მგზავრობას ორ დღეზე მეტი დასჭირდა. კიმს რომ ვიეტნამში თვითმფრინავით გაფრენა გადაეწყვიტა, იგი იქ რამდენიმე საათში ჩავიდოდა.

იმ დროს როცა კიმის მატარებელმა საზღვარი ჩინეთის გავლით გაიარა, გზები გადაკეტილი და რკინიგზის სადგურები დახურული იყო. ჩინეთის სოციალურ მედიაში გზების გადაკეტვის, მატარებლების დაგვიანების და მოძრაობის გადატვირთულობის გამო უკმაყოფილება გამოითქვა.

საზოგადოებისთვის ასევე გარკვეული დროით დახურული იყო ვიეტნამის დონგ დანგის რკინიგზის სადგური ვიდრე იქ სამშაბათ დილით კიმის მატარებელი ჩავიდოდა. იგი ახლა აღნიშნული საგურიდან ჰანოიში ლიმუზინით მიემგზავრება. მანძილი დონგ დანგიდან ჰანოიმდე დაახლოებით 170 კილომეტრია.

მცირედ გაკვირვებას შეიძლება იწვევდეს ის, რომ კიმ ჩენ ინმა მატარებლით მგზავრობის ტრადიცია არ დაარღვია, რადგან თავისი ბაბუა, ჩრდილოეთ კორეის დამფუძნებელი და პირველი ლიდერი კიმ ირ სენი ასევე მატარებლით ჩავიდა ვიეტნამსა და აღმოსავლეთ ევროპაში.

კიმის კერძო მწვანე და ყვითელი მატარებელი 21 ტყვიაგაუმტარი ვაგონისგან შედგება და ის მდიდრულადაა გაწყობლი. მატარებელში განთავსებულია ტყავის სავარძლები, საკონფერენციო ოთახები და მგავრობისთვის მაქსიმალური კომფორტია შექმნილი.

ჰანოიში ასევე დღეს ელოდებიან შეერთებული შტატების პრეზიდენტს. თეთრი სახლის პრეს-მდივნის, სარა სანდერსის განცხადებით, დონალდ ტრამპსა და კიმ ჩენ ინს შორის პირისპირ, ერთი ერთზე ხანმოკლე შეხვედრა ოთხშაბათ საღამოს გაიმართება, რის შემდეგაც ლიდერები თავიანთ მრჩევლებთან ერთად სადილზე გადაინაცვლებენ.

შეხვედრები და მოლაპარაკებები ხუთშაბათს გაგრძელდება.

როგორი განწყობით ჩადის ტრამპი ვიეტნამში? 

ამერიკის შეერთებული შტატების პრეზიდენტმა, დონალდ ტრამპმა კიმ ჩენ ინთან შეხვედრამდე რამდენიმე დღით ადრე განაცხადა, რომ ჩრდილოეთ კორეა შესაძლოა მსოფლიოს ერთ-ერთი „დიდი ეკონომიკური სახელმწიფო“ გახდეს, თუკი ის უარს იტყვის ბირთვულ იარაღზე.

ტრამპმა „თვითერზე“ დაწერა, რომ ჩრდილოეთ კორეას „სწრაფი ზრდისთვის უფრო მეტი პოტენციალი აქვს, ვიდრე ნებისმიერ სხვას“.

„თავმჯდომარე კიმი აცნობიერებს, შესაძლოა უკეთ, ვიდრე ნებისმიერი სხვა, რომ ბირთვული შეიარაღების გარეშე, მისი ქვეყნა შესაძლებელია სწრაფად გახდეს დიდი ეკონომიკური სახელმწიფო, რომელიც კი მსოფლიოს რომელიმე ადგილას შეიძლება იყოს. თავისი ადგილმდებარეობის და ხალხის (მისი) მომენტიდან გამომდინარე, მას აქვს უფრო მეტი პოტენციალი სწრაფი ზრდისთვის, ვიდრე ნებისმიერ სხვა სახელმწიფოს“, დაწერა ტრამპმა „თვითერზე“.

პრეზიდენტის ამ განცხადებამდე რამდენიმე საათით ადრე აშშ-ის სახელმწიფო მდივანმა მაიკ პომპეომ განაცხადა, რომ ფხენიანი ბირთვულ საფრთხედ რჩება.

ტრამპი ჩრდილოეთ კორეის ლიდერს, კიმ ჩენ ინს მეორედ შეხვდება, ამჯერად, 27-28 თებერვალს, ვიეტნამის დედაქალაქ ჰანოიში.

„ჩვენ, ორთავე მოველით განგრძობით პროგრესს, რასაც სინგაპურში პირველი შეხვედრისას მივაღწიეთ“, განაცხადა დონალდ ტრამპმა.

კვირა საღამოს კი, გუბერნატორების ღონისძიებაზე ტრამპმა აღნიშნა, რომ მან „ძალიან, ძალიან კარგი ურთიერთობა“ ჩამოაყალიბა კიმთან და დასძინა, რომ იგი არ ჩქარობს ზეწოლა მოახდინოს ჩრდილოეთ კორეის ბირთვულ განიარაღებაზე. „მე არ მინდა დავაჩქარო ვინმე. მე უბრალოდ არ მინდა გამოცდა. იმდენად, რამდენადაც ადგილი არ აქვს გამოცდას, ჩვენ კმაყოფილი ვართ“, თქვა ტრამპმა.