შინაგან საქმეთა მინისტრის მოადგილე ნათია მეზვრიშვილი ბიზნესმენ ლევან ვასაძის მიერ სახალხო რაზმების შექმნის შესახებ გაკეთებულ განცხადებას ეხმაურება და აცხადებს, რომ ქვეყანაში საზოგადოებრივი წესრიგის დაცვა სამართლამდაცავი ორგანოების კომპეტენციაა და არც ერთ სხვა ფორმირებას აღნიშნული ფუნქციის შესრულების უფლებამოსილება არ გააჩნია.

როგორც ნათია მეზვრიშვილმა მედიის წარმომადგენლებთან საუბრისას აღნიშნა, დაწყებულია გამოძიება, რომლის ფარგლებშიც ჩატარდება ყველა აუცილებელი საგამოძიებო მოქმედება, შეფასდება კონკრეტული პირების ქმედებები და ფაქტს სამართალებრივი შეფასება მიეცემა.

,,იმუნიტეტით ამ ქყვეყანაში ვერავინ ვერ ისარგებლებს, მით უმეტეს, როდესაც ადგილი აქვს კანონსაწინააღმდეგო ქმედებას და შინაგან საქმეთა სამინისტროს, როგორც წესი, კანონდარღვევებზე აქვს ხოლმე ადეკვატური და შესაბამისი რეაგირება. სახელმწიფო სტრუქტურების და სახელმწიფო უწყებების მსგავსი ფუნქციები რაიმე ტიპის ე.წ. ფორმირებების და წარმონაქმნების შექმნის ნებისმიერი მცდელობა ისევე, როგორც ამ ტიპის ფორმირებების ხელმძღვანელობა, ამ ტიპის ფორმირებებში გაწევრიანება, ისჯება კანონით და უფრო მეტიც, ისჯება სისხლის სამართლის კოდექსით. შესაბამისად, არავის არ უნდა გაუკვირდეს, რომ შსს-მ ამაზე რეაგირება მოახდინა უკვე - დღეს დილით გამოძიება დავიწყეთ უკანონო ფორმირების მუხლით. ახლა სამინისტრო ჩაატარებს ყველა აუცილებელ საგამოძიებო და საპროცესო მოქმედებებს, შეფასდება კონკრეტული პირის და პირების ქმდებები და მიეცემა ამას სათანადო სამართლებრივი შეფასება. ერთი რამ უნდა დავიმახსოვროთ ძალიან კარგად, რომ საზოგადოებრივი წესრიგის დაცვის ფუნქცია ამ ქვეყანაში - სამართლებრივ სახელმწიფოში ვცხოვრობთ - არის მხოლოდ სამართალდამცავი ორგანოების კომპეტენცია და არავის - არც ერთ სხვა დაჯგუფებას, თუ ფორმირებას ამ ფუნქციების შესრულების უფლებამოსილება არ გააჩნია", განაცხადა ნათია მეზვრიშვილმა.

შეკითხვაზე, შესაძლებელია, თუ არა მოხდეს ლევან ვასაძის დაკავება, მინისტრის მოადგილემ აღნიშნა:

,,დაველოდოთ გამოძიების შედეგებს".