წალკის მუნიციპალიტეტის სოფელ კიზილქილისის სომხურენოვანი საჯარო სკოლის დირექტორი აზნივ ვოსკანიანი აცხადებს, რომ არაქართულენოვანი სკოლების მასწავლებლების პროფესიული განვითარების პროგრამა, რომელსაც განათლების, მეცნიერების, კულტურისა და სპორტის სამინისტროს სსიპ მასწავლებელთა პროფესიული განვითარების ეროვნული ცენტრი 2009 წლიდან ახორციელებს, საქართველოში მცხოვრები ეთნიკური უმცირესობების წარმომადგენლებისთვის სახელმწიფო ენის სწავლებასა და სამოქალაქო ინტეგრაციას მნიშვნელოვნად უწყობს ხელს.

როგორც GUARDIAN.GE-ის აზნივ ვოსკანიანმა განუცხადა, თავადაც მიღებული აქვს მონაწილეობა აღნიშნულ პროგრამაში და - ა1 დონის და ა2 დონის შემსწავლელი კურსები წარმატებით აქვს გავლილი.

(GUARDIAN.GE-ის ფოტო: წალკის მუნიციპალიტეტის სოფელ კიზილქილისის საჯარო სკოლის დირექტორი აზნივ ვოსკანიანი) 

„საშუალო სკოლა და უმაღლესი სასწავლებელი სომხეთში დავამთავრე და როცა 4 წლის წინ სკოლის დირექტორად დავიწყე მუშაობა, პედაგოგებმა ქართული ენა თითქმის არ იცოდნენ. მათ რიცხვში ვიყავი მეც. მაგრამ ბოლო წლებში სურათი შეცვლილია. ჩვენ უკვე ნორმალურად შეგვიძლია ერთმანეთთან ქართულ ენაზე კომუნიკაცია“, განაცხადა აზნივ ვოსკანიანმა, რომელიც მიიჩნევს, რომ საქართველოში მცხოვრებმა ყველა ეროვნების ადამიანმა პატივი უნდა სცეს ქვეყნის სახელმწიფო ენას და ისწავლოს ის.

ქართული ენის ფლობის თვალსაზრისით სკოლაში არსებულ ვითარებას ანალოგიურ შეფასებას აძლევს ქართულის, როგორც მეორე ენის უფროსი მასწავლებელი ციცინო კანციანი (იგი ამჟამად მეუღლის გვარზეა გადასული და ოჯახის შექმნამდე მისი გვარი შალიკიანი იყო), რომელიც კიზილქილისის საჯარო სკოლაში 1991 წლიდან მოღვაწეობს.

(GUARDIAN.GE-ის ფოტო: მარცხნივ, კიზილქილისის საჯარო სკოლის სასწავლო ნაწილის გამგე მანუშაკ ქუჩუკიანი; შუაში, ქართულის, როგორც მეორე ენის პედაგოგი, ციცინო კანციანი; მარჯვნივ, სკოლის დირექტორი აზნივ ვოსკანიანი) 

„ადრე ელემენტარული სიტყვებიც კი არ იცოდნენ აქაურებმა, მათ შორის პედაგოგებმა. ახლა, ამ კურსების გავლის შემდეგ, ჩვენი სკოლის სომეხი ეროვნების მასწავლებლები უკვე იმ დონეზე ფლობენ ქართულ ენას, რომ პროფესიული უნარების გამოცდებს ქართულად აბარებენ.

„სამასწავლებლოში მე მათ ქართულად ველაპარაკები. ამით ისინი კიდევ უფრო იმდიდრებენ თავიანთ ლექსიკას - დამოუკიდებლადაც მუშაობენ, ტელეფონების მეშვეობით ეძებენ მათთვის უცხო სიტყვების მნიშვნელობას. ბოლო პერიოდში შედარება არ არის არა მარტო ამ მხრივ, ზოგადად, სამოქალაქო კულტურის ამაღლების თვალსაზრისითაც. სახელმწიფო ენის შესწავლამ პედაგოგებს გაცილებით გაუადვილა ქართულ საზოგადოებაში ინტეგრირება. მოგეხსენებათ, ტრენინგები და სხვა ღონისძიებები ქართულ ენაზე ტარდება და მათ უკვე აღარ უჭირთ ამაში ჩართვა“, უთხრა GUARDIAN.GE-ის ციცინო კანციანმა და დაამატა, რომ მიმდინარე წლის სექტემბრიდან ქართული ენის კურსები აღარ ტარდება და არადა, მისი თქმით, კარგი იქნებოდა ეს პროცესი გაგრძელებულიყო, რადგან სომხურენოვანი სკოლების პედაგოგებს ძალიან უნდათ ქართული ენის უფრო სიღრმისეულად შესწავლა და ასევე, სურთ, რომ კომპიუტერული პროგრამების ელემენტარულ დონეზე ცოდნის შესაძლებლობაც გააჩნდეთ.

(GUARDIAN.GE-ის ფოტო: მარჯვნივ, ციცინო კანციანი)

სსიპ მასწავლებელთა პროფესიული განვითარების ეროვნული ცენტრის განცხადებით, არაქართულენოვანი სკოლების მასწავლებლების პროფესიული განვითარების პროგრამა ორიენტირებული იყო (2016-2019 წწ.) არაქართულენოვანი სკოლების ადგილობრივი მასწავლებლების, როგორც საგნობრივი გამოცდებისთვის მომზადებაზე, ისე მათთვის სახელმწიფო ენის შესწავლაზე, ქართული ენის კურსებს კი, პროგრამის კონსულტანტ-მასწავლებლები უძღვებოდნენ.