სსიპ მარნეულის მუნიციპალიტეტის სოფელ ულაშლოს აზერბაიჯანულენოვანი საჯარო სკოლის დირექტორი ახმედ გაჯიევი აცხადებს, რომ 2006 წელს, როდესაც თავად ჩაუდგა სკოლას სათავეში, ინფრასტრუქტურის თვალსაზრისით ძალიან ცუდი მდგომარეობა დახვდა, რაც ბოლო პერიოდში გაუმჯობესდა, თუმცა პრობლემები ისევ არსებობს.

(GUARDIAN.GE-ის ფოტოზე: სსსიპ მარნეულის მუნიციპალიტეტის სოფელ ულაშლოს საჯარო სკოლის დირექტორი ახმედ გაჯიევი)

როგორც GUARDIAN.GE-ის ახმედ გაჯიევმა უთხრა, სკოლა ამჟამად კაპიტალურ რემონტს საჭიროებს, თუმცა ქვეყანაში შექმნილი ეპიდემიოლოგიური მდგომარეობიდან გამომდინარე, ეს ამ ეტაპზე ვერ მოხერხდება და ამჯერად მხოლოდ სველი წერტილების მოწესრიგებით დაკმაყოფილდებიან, მომავალში კი, არ არის გამორიცხული მათსავე კუთვნილ მიწაზე, რომელიც 8 000კვ.მ. შეადგენს, ახალი სკოლა აშენდეს.

(GUARDIAN.GE-ის ფოტოზე: სსიპ მარნეულის მუნიციპალიტეტის სოფელ ულაშლოს საჯარო სკოლა)

„ამჟამად სკოლაში 103 მოსწავლე გვყავს. როგორც იცით, უკვე სამი თვეა დისტანციურად ტარდება გაკვეთილები და ამ მხრივ ჩვენს სკოლაში პროცესი შეფერხების გარეშე მიდის. მე აქ 45 წელია რაც აზერბაიჯანულ ენას და ლიტერატურას ვასწავლი, დირექტორად კი 2006 წელს დავინიშნე. უმაღლესი სასწავლებელი თბილისში დავამთავრე, 1975 წელს, მაშინდელი პუშკინის სახელობის პედაგოგიური ინსტიტუტი და მას მერე აქ ვარ“, ამბობს ახმედ გაჯიევი.

(GUARDIAN.GE-ის ფოტოზე მარცხნიდან მარჯვნივ: სსიპ მარნეულის მუნიციპალიტეტის სოფელ ულაშლოს საჯარო სკოლის დირექტორი ახმედ გაჯიევი და მათემატიკის მასწავლებელი ელშად აბდალოვი)

მას მიაჩნია, რომ საბჭოთა კავშირის დროს სწავლის დონე ხარისხიანი იყო, თუმცა მისი დაშლის შემდეგ, გასული საუკუნის 90-იან წლებში, ისევე როგორც სხვა სფეროებში, საგანმანათლებლო სისტემაშიც რთული პერიოდი დადგა.

(GUARDIAN.GE-ის ფოტოზე: სსსიპ მარნეულის მუნიციპალიტეტის სოფელ ულაშლოს საჯარო სკოლის დირექტორი ახმედ გაჯიევი)

„ამ დროს ბევრი წავიდა სოფლიდან, რაიონიდან სხვაგან საცხოვრებლად - ძირითადად რუსეთში და აზერბაიჯანში. სკოლებიც არაერთმა პედაგოგმა დატოვა, კუპონების დრო იყო და ხშირად ამ გაუფასურებულ კუპონებსაც ვერ ვიღებდით, მაგრამ უხელფასობის და რთული პერიოდის მიუხედავად არ მიგვიტოვებია სკოლა. დღეს, საბედნიეროდ, შედარებაც არ არის ისე ვართ წინ წასული. არაერთი რეფორმა ჩატარდა ბოლო წლებში, მასწავლებლებს და ადმინისტრაციასაც მოემატათ ხელფასები და რაც მისასალმებელია, ამაღლდა ქართულის, როგორც მეორე ენის სწავლების დონე - კვირაში 5 გაკვეთილი ტარდება და უკვე აზერბაიჯანელების ახალგაზრდა თაობა გამართულად საუბრობს და კითხულობს ქართულად. ჩვენ დროს კი, სულ სხვა სურათი იყო. კვირაში მხოლოდ 1 საათი ეთმობოდა ქართულ ენას და შედეგიც უარყოფითი იყო. ახლა სკოლაში ქართული სექტორიც მოქმედებს, სადაც 9 ბავშვი სწავლობს. საქართველოს ყველა მოქალაქემ, აქ მცხოვრებმა ადამიანებმა აუცილებლად უნდა იცოდნენ ჩვენი ქვეყნის სახელმწიფო ენა“, უთხრა GUARDIAN.GE-ის ახმედ გაჯიევმა ქართულ ენაზე და დაამატა, რომ ულაშლოს სკოლის კურსდამთავრებულები წარმატებით განაგრძობენ სწავლას თბილისის სხვადასხვა უმაღლეს სასწავლებელში.

(GUARDIAN.GE-ის ფოტოზე: სსიპ მარნეულის მუნიციპალიტეტის სოფელ ულაშლოს საჯარო სკოლის მათემატიკის მასწავლებელი და ბუღალტერი ელშად აბდალოვი)

„ერთ-ერთი წარმატებული სტუდენტი საიდ აბდალოვია“ - სიამაყით ჩაერთო საუბარში ულაშლოს საჯარო სკოლის მათემატიკის მასწავლებელი და ბუღალტერი, ელშად აბდალოვი. „საიდი ჩემი შვილიშვილია“ - განაგრძობს იგი - „მან ულაშლოს სკოლა 2016 წელს დაამთავრა, იმ წელსვე ჩააბარა თბილისის ტექნიკური უნივერსიტეტის კომპიუტერული ტექნოლოგიის ფაკულტეტზე და უკვე ასრულებს საბაკალავრო პროგრამას და ამავე უნივერსიტეტში აპირებს სამაგისტრო პროგრამაზე სწავლის გაგრძელებას“, განუცხადა GUARDIAN.GE-ის ელშად აბდალოვმა რუსულ ენაზე.

(GUARDIAN.GE-ის ფოტოზე: სსსიპ მარნეულის მუნიციპალიტეტის სოფელ ულაშლოს საჯარო სკოლის დირექტორი ახმედ გაჯიევი)

სკოლის დირექტორის თქმით, 2018 წელს ულაშლოს საჯარო სკოლა 8 მოსწავლემ დაამთავრა, მათგან ოთხმა თბილისის ივანე ჯავახიშვილის სახელობის სახელმწიფო უნივერსიტეტში ჩააბარა, ხოლო ერთმა თბილისის სამედიცინო უნივერსიტეტში.

(GUARDIAN.GE-ის ფოტოზე: სსსიპ მარნეულის მუნიციპალიტეტის სოფელ ულაშლოს საჯარო სკოლის დირექტორი ახმედ გაჯიევი)

„სოფელში ახლა დაახლოებით 300 ოჯახი ცხოვრობს. ადრე, გასული საუკუნის 80-იან წლებში აქ 250-მდე მოსწავლე სწავლობდა, 2,5-ჯერ მეტი ვიდრე ახლა. ადრე უფრო მრავალშვილიანობა იყო. ჩვენ 8 დედმამიშვილი ვიყავით. ბატონი ახმედის მამას 2 ძმა და 2 და ჰყავდა. ახლა მხოლოდ 1-2 შვილს სჯერდებიან და ამიტომაც იკლო სოფლის მცხოვრებთა რაოდენობამ“, სინანულით ამბობს ელშად აბდალოვი, რომელმაც 1976 წელს დაამთავრა აზერბაიჯანის კიროვაბადის (დღევანდელი განჯა) პედაგოგიური ინსტიტუტის მათემატიკის ფაკულტეტი დაუსწრებლად და ულაშლოს სკოლაში მასწავლებლად მუშაობა ახმედ გაჯიევზე 2 წლით ადრე დაიწყო.

(GUARDIAN.GE-ის ფოტოზე: სსიპ მარნეულის მუნიციპალიტეტის სოფელ ულაშლოს საჯარო სკოლის მათემატიკის მასწავლებელი და ბუღალტერი ელშად აბდალოვი)

„45 წელია რაც ერთად ვართ სკოლაში, თუმცა ჩვენი ურთიერთობა კიდევ უფრო მეტ პერიოდს ითვლის. ახმედი უყვართ ბავშვებს, მშობლებს, მთელ სოფელს. მეტი რა უნდა ინატრო კაცმა. მან თავისი საგანი და საქმე 5 თითივით იცის, თუმცა თავმდაბალი კაცია და ეს კიდევ უფრო მეტად ამაღლებს მას“, აცხადებს GUARDIAN.GE-ისთან საუბარში ელშად აბდალოვი.

(GUARDIAN.GE-ის ფოტოზე მარცხნიდან მარჯვნივ: სსიპ მარნეულის მუნიციპალიტეტის სოფელ ულაშლოს საჯარო სკოლის დირექტორი ახმედ გაჯიევი და მათემატიკის მასწავლებელი ელშად აბდალოვი)