(GUARDIAN.GE) - წალკის მუნიციპალიტეტის სოფელ ჩივთქილისის სომხურენოვან საჯარო სკოლაში ონლაინ სწავლება ბოლო 3 თვის განმავლობაში შეუფერხებლად მიმდინარეობს და სასწავლო წლის დასრულებამდე რამდენიმე დღით ადრე სკოლის დირექტორი, ქალბატონი ვართუი სარკსიანი აცხადებს, რომ დისტანციური სწავლება წარმატებით მიდის დასასრულისკენ.

(GUARDIAN.GE-ის ფოტოზე: ჩივთქილისის საჯარო სკოლის დირექტორი, ქალბატონი ვართუი სარკსიანი)

თუმცა იგი მოუთმენლად ელოდება ახალი სასწავლო წლის ტრადიციული მეთოდით, საკლასო ოთახებში გაგრძელებას და იმედს იტოვებს, რომ სექტემბრისთვის, საქართველოში არსებული ეპიდემიოლოგიური მდგომარეობა საშუალებას მისცემს განათლების სამინისტროს, რომ სწავლის პროცესი ჩვეულ სტილში განახლდეს.

(GUARDIAN.GE-ის ფოტოზე: წალკის მუნიციპალიტეტის სოფელი ჩივთქილისა - ხელმარცხნივ სკოლის შენობა)

„დღემდე არსებული მდგომარეობით, ძალზე კმაყოფილები ვართ. საქართველოში კორონავირუსის გავრცელების მხრივ, საბედნიეროდ, კარგი სურათია. შორს რომ არ წავიდეთ, ვხედავთ რა ხდება ჩვენს მეზობელ სომხეთში. საქართველოს მთავრობამ და ექიმებმა საუკეთესოდ მართეს პროცესები. მართალია, სახლებიდან მუშაობას სკოლაში სიარული და გაკვეთილების საკლასო ოთახებში ჩატარება გვირჩევნია, მაგრამ ახლა ასე იყო საჭირო ჩვენი და ჩვენი ბავშვების უსაფრთხოებისთვის. სწორედ იმიტომ გვაქვს ასეთი კარგი შედეგები, რომ მთავრობამ დროული და მკაცრი ნაბიჯები გადადგა. ჩვენ მადლობის მეტი არაფერი გვეთქმის მთავრობის მიმართ, ყველანაირად, რადგან მაქსიმალურად შეგვიწყვეს ხელი და მეორე სემესტრი არ ჩავარდა, აკადემიური წელი არ გამოცხადდა“, უთხრა GUARDIAN.GE-ის ვართუი სარკსიანმა.

(GUARDIAN.GE-ის ფოტოზე: ჩივთქილისის საჯარო სკოლის დირექტორი ვართუი სარკსიანი მასწავლებლებთან ერთად)

ამავე აზრზეა ჩივთქილისის საჯარო სკოლის რუსული ენისა და ლიტერატურის მასწავლებელი სურიკ ბაბოიანი. მისი თქმით, დღეს მსოფლიოში იშვიათია ქვეყანა, რომელსაც კორონავირუსთან ბრძოლის თვალსაზრისით იმაზე კარგი შედეგები შეიძლება ჰქონდეს, როგორც ეს საქართველოს აქვს.

(GUARDIAN.GE-ის ფოტოზე: ჩივთქილისის საჯარო სკოლის რუსული ენისა და ლიტერატურის მასწავლებელი სურიკ ბაბოიანი)
 

„ყოველდღიურად ვეცნობი მსოფლიოს ახალ ამბებს და ვუყურებ თუ როგორი მძიმე მდგომარეობაა ისეთ განვითარებულ ქვეყნებში, როგორიცაა ამერიკის შეერთებული შტატები, დიდი ბრიტანეთი, საფრანგეთი, იტალია, ესპანეთი და ა.შ. აგერ, ვუყურებთ რა ხდება რუსეთში და სომხეთში. ამ დროს კი, ჩვენ ქვეყანაში ერთ-ერთი ყველაზე კარგი ვითარებაა. ჩვენი მთავრობის მიერ განხორციელებული ღონისძიებების დადებითად შეუფასებლობა დიდ უმადურებად მიმაჩნია. ჩვენ, ამ სოფლის პედაგოგები, დიდ მადლობას ვუცხადებთ მთავრობას. გარდა იმისა, რომ მათ იზრუნეს ჩვენი ქვეყნის მოქალაქეების ჯანმრთელობაზე, ასევე არ შეაფერხეს სწავლის პროცესიც, მაქსიმალურად სწრაფად დანერგეს ახალი პროგრამა, რითაც გაკვეთილების დისტანციურ რეჟიმში ჩატარების შესაძლებლობა მოგვცეს“, განუცხადა GUARDIAN.GE-ის სურიკ ბაბოიანმა რუსულ ენაზე.

(GUARDIAN.GE-ის ფოტოზე: ჩივთქილისის საჯარო სკოლის დირექტორი ვართუი სარკსიანი რუსული ენისა და ლიტერატურის მასწავლებელ სურიკ ბაბოიანთან ერთად)

ბატონი სურიკის მეუღლე, ქალბატონი არევიკ ბალიანი ჩივთქილისის საჯარო სკოლაში დაწყებითი კლასების მასწავლებელია. იგი ამბობს, რომ მოსწავლეები მობილიზებული არიან და ონლაინ სწავლების პროცესი მათთან საუკეთესოდ მიმდინარეობს.

(GUARDIAN.GE-ის ფოტოზე: ჩივთქილისის საჯარო სკოლის დაწყებითი კლასების მასწავლებელი არევიკ ბალოიანი)
 

„მე პატარებთან მაქვს ურთიერთობა და ვხედავ, რომ მათ ძალზე უყვართ ტელეფონები და კომპიუტერები. მოუთმენლად ელოდებიან ონლაინ გაკვეთილის დაწყებას. უნდა ითქვას, რომ ძალზე მონდომებულები არიან და დიდი პასუხისმგებლობით ეკიდებიან სწავლას. ბუნებრივია, მათ მშობლებიც ეხმარებიან და შეიძლება ითქვას, ასე ერთობლივად ვმუშაობთ დისტანციურად, მაგრამ გულწრფელად რომ გითხრათ, სკოლა ძალზე მოგვენატრა, ყველას - მასწავლებლებსაც და ბავშვებსაც. აქაურ ჟრიამულს არაფერი შეედრება. დიდი იმედი გვაქვს, რომ სექტემბრიდან კვლავ ახმაურდება ჩვენი სკოლა და სხვა სკოლებიც“, აღნიშნა ქალბატონმა არევიკ ბალიანმა (რუსულ და სომხურ ენებზე), რომელიც ჩივთქილისის საჯარო სკოლაში თავის მეუღლესთან ერთად უკვე რამდენიმე ათეული წელი ასწავლის, განსხვავებით ახალგაზრდა წყვილისა - გეოგრაფიის მასწავლებლის, გიორგი ვოსკანიანის და მისი მეუღლის, მარიამ ფიდოიანისა, რომლებიც ახლახან შეუდგნენ პედაგოგიურ საქმიანობას.

(GUARDIAN.GE-ის ფოტოზე: გიორგი ვოსკანიანი, წალკის მუნიციპალიტეტის სოფელ ჩივთქილისის საჯარო სკოლის გეოგრაფიის და ბუნების მასწავლებელი)

გიორგი ვოსკანიანმა ჩივთქილისის საჯარო სკოლა დაამთავრა, შემდეგ კი, 2017 წელს, წითელ დიპლომზე თბილისის ივანე ჯავახიშვილის სახელობის სახელმწიფო უნივერსიტეტის საბუნებისმეტყველო მეცნიერებათა ფაკულტეტის საბაკალავრო პროგრამა და დირექტორის, ქალბატონი ვართუი სარკსიანის წყალობით, მშობლიურ სკოლაში შეუდგა პედაგოგიურ საქმიანობას.

(GUARDIAN.GE-ის ფოტოზე წალკის მუნიციპალიტეტის სოფელ ჩივთქილისის საჯარო სკოლის დირექტორი ვართუი სარკსიანი)

„ჩემთვის ნდობის გამოცხადების მიზეზი ალბათ ისიც იყო, რომ ქალბატონი ვართუი ბავშვობიდანვე მიცნობდა, ჩემი მასწავლებელი და დირექტორი იყო და ჩემზე ყველაფერი იცოდა. სკოლაში მუშაობის პირველ ეტაპს სირთულეები ახლდა. პედაგოგიური განათლება არ მქონდა, მაგრამ 1 წელიწადში, 2018 წელს, გეოგრაფიის საგანი ჩავაბარე, თუმცა მასწავლებლობისთვის მხოლოდ საგნის ჩაბარება არ იყო საკმარისი და ახლახან წარმატებით გავიარე მასწავლებლობის მაძიებლის კურსი, რომლის აკადემიური ნაწილი დავასრულე და გამომდინარე პანდემიიდან, პრაქტიკული ნაწილის გავლა ალბათ შემოდგომით მომიწევს და ამის შემდეგ შეიძლება რომ მომენიჭოს უფროსი მასწავლებლის სტატუსი“, თქვა GUARDIAN.GE-ისთან საუბრისას გიორგი ვოსკანიანმა. (მასზე ვრცელი სტატია იხილეთ ბმულზე).

(GUARDIAN.GE-ის ფოტოზე: გიორგი ვოსკანიანი, წალკის მუნიციპალიტეტის სოფელ ჩივთქილისის საჯარო სკოლის გეოგრაფიის და ბუნების მასწავლებელი)
 

გიორგი ვოსკანიანის მეუღლემ, მარიამ ფიდოიანმა ჩივთქილისის საჯარო სკოლაში მასწავლებლად მუშაობა ცოტა მოგვიანებით, 2019 წლის სექტემბერში დაიწყო და ჯერჯერობით უსტატუსო პედაგოგია. იგი დაწყებით კლასებს ქართულს, როგორც მეორე ენას და მათემატიკას ასწავლის.

(GUARDIAN.GE-ის ფოტოზე: ჩივთქილისის საჯარო სკოლის დირექტორი ვართუი სარკსიანი მასწავლებლებთან ერთად)
 

„ჩვენთვის დიდი სირთულე არ შეუქმნია იმას, რომ დისტანციურ პირობებში მოგვიწია გაკვეთილების ჩატარებამ. პატარა ასაკის ბავშვები ზოგადად, დიდ ინტერესს იჩენენ ხოლმე ტექნოლოგიების მიმართ და მათტან ინტერნეტის მეშვეობით ურთიერთობა პრობლემას არ წარმოადგენს. მართალია, ყველას გვირჩევნია, რომ სკოლაში დავდიოდეთ და აქ ვატარებდეთ გაკვეთილებს, მაგრამ ახლა ასეთი ვითარება შეიქნა. ვფიქრობ, რომ სექტემბრიდან შევძლებთ ისევ დავუბრუნდეთ საკლასო ოთახებს“, განუცხადა GUARDIAN.GE-ის მარიამ ფიდოიანმა ჩივთქილისის საჯარო სკოლის ეზოში.

GUARDIAN.GE-ის ფოტოზე: მარიამ ფიდოიანი ჩივთქილისის საჯარო სკოლის დაწყებითი კლასების ქართული ენისა და მათემატიკის მასწავლებელი

(GUARDIAN.GE-ის ფოტოზე დაბლა: გიორგი ვოსკანიანი თავის მეუღლესთან, მარიამ ფიდოიანთან ერთად - გიორგიმ მომავალი მეუღლე, მარიამ ფიდოიანი, რომელიც ჩივთქილისის ახლომდებარე სოფელ აშკალადანაა, თბილისში, უნივერსიტეტში სწავლის პერიოდში გაიცნო და ახლა ისინი ერთ სკოლაში ასწავლიან).