(GUARDIAN.GE) - სსიპ წალკის მუნიციპალიტეტის სოფელ ჩივთქილისის სომხურენოვან საჯარო სკოლაში ახალი 2020-2021 სასწავლო წელი საკლასო ოთახებში დაიწყო.

როგორც GUARDIAN.GE-ის სკოლის დირექტორმა ვართუი სარკსიანმა განუცხადა, ამ პროცესს მოუთმენლად ელოდნენ როგორც მასწავლებლები, ისე მოსწავლეები და მათი მშობლები.

„საბედნიეროდ, ამ დრომდე წალკის მუნიციპალიტეტის არც ერთ სოფელში კორონავირუსის შემთხვევა არ გამოვლენილა. მოგეხსენებათ, საქართველო-სომხეთის საზღვარი ჩაკეტილია და მიმოსვლა შეჩერებულია. ამან ხელი შეუწყო იმას, რომ სომხეთიდან, სადაც გასული თვეების განმავლობაში ვირუსით ინფიცირებულთა დიდი რაოდენობა ფიქსირდებოდა, კორონავირუსის გავრცელების რისკები მთლიანად აღმოიფხვრა.

„თუმცა ახლა, როგორც ვხედავთ, საქართველოშიც საგრძნობლად მოიმატა შემთხვევებმა და აქედან გამომდინარე, ყველას დიდი სიფრთხილის გამოჩენა გვმართებს.

(GUARDIAN.GE-ის ფოტოზე: შაქრო ხაჩატურიან, წალკის მუნიციპალიტეტის სოფელ ჩივთქილისის საჯარო სკოლის გეოგრაფიის მასწავლებელი გაკვეთილის ჩატარების პროცესში)

„წალკაში, როგორც გითხარით, ვირუსი ამ დრომდე არ დაფიქსირებულა, მაგრამ ეს დამშვიდების საშუალებას არ იძლევა, რადგან საფრთხე ისევ არსებობს, მით უფრო სეზონური გრიპის პერიოდიც ახლოვდება“, უთხრა ვართუი სარკსიანმა GUARDIAN.GE-ის.

მისი თქმით, ჩივთქილისის საჯარო სკოლამ საქართველოს ჯანდაცვისა და განათლების სამინისტროების ყველა ის რეკომენდაცია გაითვალისწინა და შეასრულა, რომელიც სასწავლო პროცესის განახლებისთვის იყო აუცილებელი.

„სკოლაში ამჟამად 57 მოსწავლე სწავლობს. როგორც უყურებთ, შენობა დიდი მოცულობის არ არის და აქედან გამომდინარე, სოციალური დისტანციისთვის დაწესებული ნორმის დარღვევის და სასწავლო პროცესის დაწყების საფრთხის წინაშე ვიდექით, თუმცა მოვახერხეთ კლასების ისე გადანაწილება, რომ ეს პრობლემა აღმოგვეფხვრა და სასწავლო პროცესის დაწყება კითხვის ნიშნის ქვეშ არ დაგვეყენებინა. სხვა მხრივ, ყველაფერი რიგზე გვქონდა და გვაქვს.

„მოწესრიგებულია ტუალეტი, წყლის სისტემა, დაცულია ჰიგიენური ნორმები. ამ საკითხებს კორონავირუსის პანდემიამდეც დიდ ყურადღებას ვაქცევდით.

(GUARDIAN.GE-ის ფოტოზე: ემილ ხაჩატურიან, წალკის მუნიციპალიტეტის სოფელ ჩივთქილისის საჯარო სკოლის მათემატიკის უფროსი მასწავლებელი

ემილ ხაჩატურიანმა 2000 წელს დაიწყო წალკის მუნიციპალიტეტის სოფელ ჩივთქილისის სომხურენოვან საჯარო სკოლაში მათემატიკის მასწავლებლად მუშაობა და 2006 წელს, მას შემდეგ რაც სკოლები საჯარო სამართლის იურიდიული პირები გახდნენ და დამოუკიდებელი ბიუჯეტები მიეცათ, ბუღალტრის თანამდებობაზეც დაინიშნა. მან ქართული ენის შესწავლა 40 წლის ასაკში დაიწყო და პროფესიული უნარების გამოცდა ქართულ ენაზე წარმატებით ჩააბარა - 7 კრედიტი მიიღო. მასალა იხილეთ ამ ბმულზე).

„თავადაც ხართ მომსწრე იმისა, თუ როგორ მდგომარეობაში ვფუნქციონირებდით გასულ წლებში. მაგრამ ახლა ტრადიციულ მიდგომებს კიდევ ახალი კომპონენტები დაემატა და ამასაც სრულად ვიცავთ“, განუცხადა GUARDIAN.GE-ის ვართუი სარკსიანმა.

იგი უკვე 30 წელზე მეტია ჩივთქილისის საჯარო სკოლის უცვლელი დირექტორია.

მან 2019 წლის ნოემბერში, პროფესიული უნარების გამოცდის წარმატებით ჩაბარების, მანამდე კი, ბიოლოგიაში გამოცდაზეც საჭირო კრედიტ-ქულის მიღების შედეგად შეძლო რომ 69 წლის ასაკში უფროსი მასწავლებელი გამხდარიყო.

(GUARDIAN.GE-ის ფოტოზე: გიორგი ვოსკანიან, წალკის მუნიციპალიტეტის სოფელ ჩივთქილისის საჯარო სკოლის გეოგრაფიის და ბუნების მასწავლებელი. გიორგი ვოსკანიანზე სტატია სათაურით - ჩივთქილისელმა სომეხმა ბიჭმა, რომელმაც მე-11 კლასამდე ქართული ენა არ იცოდა, თსუ წითელ დიპლომზე დაამთავრა და ახლა მშობლიურ სკოლაში გეოგრაფიას ასწავლის - იხილეთ ამ ბმულზე)

ვართუი სარკსიანმა ჩივთქილისის საჯარო სკოლაში არაერთ ახალგაზრდა მასწავლებელს მისცა მუშაობის დაწყების საშუალება.

მარიამ ფიდოიანმა ჩივთქილისის საჯარო სკოლაში დაწყებითი კლასების ქართული ენისა და მათემატიკის მასწავლებლად მუშაობა 2019 წელს დაიწყო და იგი ჯერჯერობით უსტატუსო პედაგოგია

ბოლო წლებში აქ პედაგოგიური კარიერა დაიწყეს გიორგი ვოსკანიანმა და მისმა მეუღლემ, მარიამ ფიდოიანმა.

მიმდინარე წელს კი ამავე სკოლის გუნდს შეუერთდა დიდი ბრიტანეთის ბირმინგემის უნივერსიტეტის წარჩინებული კურსდამთავრებული ნატალია პონომარიოვა-აბულაძე. იგი ბავშვებს ინგლისურ ენას ასწავლის.

(GUARDIAN.GE ნატალია პონომარიოვა-აბულაძეზე ვრცელ მასალას ახლო მომავალში შემოგთავაზებთ).

(GUARDIAN.GE-ის ფოტოზე: ნატალია პონომარიოვა-აბულაძე, ჩივთქილისის საჯარო სკოლის ინგლისური ენის მასწავლებელი)

„ჩვენ ყველანაირად ხელს ვუწყობთ ახალგაზრდა კადრებს. 2019 წელს მასწავლებლის ჯილდოს მიღების შემდეგ არაერთმა ღირსეულმა პედაგოგმა დატოვა სკოლა და მათ ნაცვლად ახალგაზრდებმა დაიწყეს მუშაობა. მათ განვითარების ყველანაირი საშუალება უნდა მიეცეთ.

(GUARDIAN.GE-ის ფოტოები. ქალბატონი ვართუი სარკსიან მე-12 კლასში ქიმიის გაკვეთილს ატარებს)

„მთავარია, ახლა ქვეყანაში ეპიდემიოლოგიური სურათი უარესობისაკენ არ შეიცვალოს და მოგვეცეს სასწავლო პროცესის საკლასო ოთახებში გაგრძელების საშუალება“, განაცხადა ვართუი სარკსიანმა, რომელმაც ონლაინ სწავლების პერიოდიც შეაფასა.

„მოგეხსენებათ, მარტის არდადეგების შემდეგ საქართველოს საჯარო სკოლებში სწავლება დისტანციურად წარიმართა. ეს სრულიად ახალი გამოწვევა აღმოჩნდა ჩვენთვის, ისევე როგორც, დარწმუნებული ვარ, ყველა სხვა დანარჩენი სკოლისთვის, როგორც პედაგოგების, ისე მოსწავლეებისა და მშობლებისთვის.

„მიუხედავად ამისა, მაქსიმალურად კარგად გავართვით თავი ამ პერიოდს, მაგრამ გულწრფელად რომ ვთქვათ, ონლაინ სწავლება ვერ არის ისეთი სრულყოფილი, როგორც რეალური, ცოცხალი, საკლასო ოთახში მიმდინარე სწავლება.

„აქ სულ სხვა გარემო ყალიბდება, უშუალო შეხება გაქვს ბავშვებთან, ისევე როგორც მათ აქვთ ასეთივე უშუალო დამოკიდებულება თავიანთ მასწავლებლებთან.

„ახლა კიდევ უფრო კარგად გავიაზრეთ თუ რამდენად დიდი მნიშვნელობა აქვს საკლასო ოთახში ჩატარებულ გაკვეთილებს.

„რამდენიმე დღეა რაც ტრადიციულ გარემოში დავიწყეთ ახალი სასწავლო წელი და ყველანი რაღაცნაირად გახარებულები ვართ.

„მიუხედავად იმისა, რომ პედაგოგებიც და ბავშვებიც ერთ სოფელში ვცხოვრობთ და დიდი ქალაქებისაგან განსხვავებით აქ ერთმანეთთან ყოველდღიური კომუნიკაციის პრობლემა არ გვაქვს, სკოლაში სასწავლო წლის განახლება მაინც სულ სხვანაირი მომენტი აღმოჩნდა.

„მინდა, ეს ხალისი და შემართება, რაც ახლა გვაქვს, კიდევ უფრო ენერგიულად გაგრძელდეს და რაც მთავარია აისახოს ბავშვების სწავლის ხარისხზე.

„მინდა წლევანდელმა მე-12 კლასელებმა და მათმა პედაგოგებმა ბოლო ზარი ერთად, სკოლაში აღნიშნონ“, განუცხადა ვართუი სარკსიანმა GUARDIAN.GE-ის.