GUARDIAN.GE - სსიპ ახალქალაქის მუნიციპალიტეტის სოფელ ბავრის სომხურენოვან საჯარო სკოლაში ბოლო წლებში მოსწავლეთა რაოდენობა შემცირდა, რასაც სკოლის დირექტორი მისაკ შირინიანი მიგრაციის მაღალი დონით და შობადობის კლებით ხსნის.

„ამჟამად სკოლაში 104 მოსწავლე ირიცხება. როგორც სხვაგან, აქაც მიგრაციას აქვს ადგილი, რეგიონში სამუშაო ადგილების არარსებობის გამო, ადამიანები ოჯახებით მიდიან საზღვარგარეთ სამუშაოდ და საცხოვრებლად. ეკონომიკური პირობებიდან გამომდინარე, იკლო შობადობამ და ბუნებრივია, ეს სოფლების სკოლების კონტინგენტზეც აისახა. ბავრა ამ მხრივ გამონაკლისი არ არის, ახალქალაქის მუნიციპალიტეტის სხვა სოფლებშიც ანალოგიური მდგომარეობაა“, - განუცხადა მისაკ შირინიანმა GUARDIAN.GE-ის.

დირექტორის ინფორმაციით, ამჟამად სკოლაში 13 უფროსი და 12 პრაქტიკოსი მასწავლებელი ასწავლის. 2022 წლის ზაფხულში ჩატარებულ გამოცდებზე კი, ბავრის საჯარო სკოლის პედაგოგებიდან შვიდი იყო გასული.

„ნაწილმა მოიპოვა წარმატება, ნაწილმა ვერა. ჯერ კიდევ საკმაოდ გვყავს პრაქტიკოსი მასწავლებლები, რადგან გარკვეულ საგნებში კადრების დეფიციტია და რომ არა პრაქტიკოსი მასწავლებლები, შესაძლოა, პრობლემების წინაშე აღმოვჩნდეთ“, - უთხრა მისაკ შირინიანმა GUARDIAN.GE-ის.

მისაკ შირინიანმა ახალქალაქის რაიონის სოფელ გულიკამის საშუალო სკოლის დამთავრების შემდეგ სწავლა ერევნის ხაჩატურ აბოვიანის სახელობის პედ. ინსტიტუტის მათემატიკის ფაკულტეტზე განაგრძო, რომლის დასრულების შემდეგაც მშობლიურ რაიონს დაუბრუნდა. 2010 წლიდან ბავრის საჯარო სკოლის დირექტორად, 2019 წლიდან კი, მოვალეობის შემსრულებლად მუშაობს, მანამდე ამავე სკოლაში მათემატიკას ასწავლიდა. იგი დირექტორთა სერტიფიცირებაში მონაწილეობას არ აპირებს.

ახალქალაქის მუნიციპალიტეტის სოფელ ბავრის სომხურენოვანი საჯარო სკოლის დირექტორის მოადგილესთან, ქართული ენისა და ლიტერატურის მასწავლებელთან, ჯულიეტა შირინიანთან ინტერვიუს კი, გაეცანით ამ ბმულზე.