„ლეიბორისტული პარტიის“ ლიდერმა და საპრეზიდენტო კანდიდატმა, შალვა ნათელაშვილმა დღეს გამართულ ბრიფინგზე ლარის გაუფასურების მიზეზებზე ისაუბრა და აღნიშნა, რომ თურქული ლირის კრიზისი ჩვენს ეროვნულ ვალუტასთან არანაირ კავშირშია და ეს მიზეზი „მმართველმა საბანკო ოლიგარქიამ მილიონების ამოსაღებად გამოიყენა“, რის გამოც, ნათელაშვილის განცხადებით, ეროვნული ბანკის პრეზიდენტი და ბანკების მფლობელები, ივანიშვილთან ერთად, აუცილებლად დაჯდებიან საბრალდებო სკამზე. მანვე დაამატა, რომ ამგვარი სავალუტო სპეკულაციებით, ბოლო 6 თვის მანძილზე, „სტატისტიკურად, 111 მილიონი ლარის მოგება ნახეს“, ხოლო „6 წლის განმავლობაში 3.5 მილიარდ ლარზე მეტია ჩვენგან წაგლეჯილი“, რის გამოც, „სპეციალური საფინანსო ტრიბუნალის შექმნა გარდაუვლად ელოდება ივანიშვილსა და მის ბანდას“.


ნათელაშვილის თქმით, „ნორმალური ხელისუფლების“ პირობებში ეროვნული ვალუტა ერთ-ერთი პერსპექტიული ფულადი ერთეული იქნებოდა რეგიონში, საქართველოში მდებარე უმნიშვნელოვანესი სატრანსპორტო გზების წყალობით, რომელთა გარეშეც „ვერც ლირა, ვერც ევრო, ვერც დოლარი და ვერც მანათი ვერ გაჭაჭანდება და განვითარდება“. მისი თქმით, „ერთადერთი გზა არის ივანიშვილისა და მისი გუნდის მხილება და ზარალის ანაზღაურება“.

„მმართველმა საბანკო ოლიგარქიამ მილიონების ამოსაღებად ამჯერად გამოიყენა თურქული კრიზისი და გაუშვა ლარი დევალვაციაზე, რაც წარმოადგენს კრიმინალს, ბოროტმოქმედებას და რის გამოც, ეროვნული ბანკის პრეზიდენტი და ბანკების მფლობელები, ივანიშვილთან ერთად, აუცილებლად დაჯდებიან საბრალდებო სკამზე. ამგვარი სავალუტო სპეკულაციებით ჩვენი ჯიბიდან ამოიღეს 111 მილიონი ლარი. „ქართული ოცნების“ მმართველობის 6 წლის განმავლობაში 3.5 მილიარდ ლარზე მეტია ჩვენგან წაგლეჯილი. ეს არის უდიდესი საერთაშორისო საფინანსო დანაშაული და სპეციალური საფინანსო ტრიბუნალის შექმნა გარდაუვლად ელოდება ივანიშვილსა და მის ბანდას. ლარის გაუფასურება თურქული ლირის პრობლემებთან არანაირ კავშირშია. ჩვენ რომ ვიყოთ დიდი სამრეწველო პოტენციალის ქვეყანა და გვქონდეს ბაზარი თურქეთთან, როგორც სივრცე, და იქ გაგვქონდეს საქონელი, კიდევ შეიძლებოდა რაღაცის ახსნა და განმარტება რომ ლარზე იმოქმედა. აზერბაიჯანულ მანათს არაფერი მოსვლია. აზერბაიჯანელები და თურქები ეთნიკურად, ეკონომიკურად და ცივილიზაციურადაც ტყუპი ძმები არიან. რაღა ჩვენს ლარს დაეტაკა თურქული ლირის პრობლემები?! ეს პრობლემები, ვფიქრობ, დროებითია, რადგან ამერიკა და ანკარა გამონახავენ საერთო შეხების წერტილებს, რადგან ორივე ნატო-ს წევრია. ცხადზე ცხადია, რომ ხელისუფლებამ „ქართუ ბანკი“, რომელიც არის ლიდერი ამ საბანკო იმპერიისა, ელოდება მიზეზებს, რომ ეს ყაჩაღობა რაიმეთი ახსნას. ჯერ დოლარს დააბრალეს, მერე ევროს აბრალებდნენ, მერე რუბლზე გადავიდნენ, ნუ იაპონურ იენამდე ჯერჯერობით არ მისულან, მარა თუ დასცალდათ იქაც მივლენ, აუცილებლად. იმედია, არ დასცალდებათ. შესაბამისად, ქვეყანა, რომლის სავალუტო რესურსი აწყობილია საერთაშორისო საფინანსო ორგანიზაციების სესხებზე და რომელსაც ყველა პუნქტი გაწერილი აქვს, ქვეყანა, რომელიც არ არის დამოკიდებული ეკონომიკის ზრდის ტემპებზე, პროდუქციის გამოშვებაზე, იმპორტზე და გადაქცეულია თურქული და უცხოური საქონლის გასაღების ბაზრად, ვერ იქნება დამოკიდებული უცხოურ წამყვან ვალუტებზე. ჩვენ, ფაქტობრივად, ჯერ გვაქვს საექსპერიმენტო ეკონომიკა, სამწუხაროდ, ოლიგარქიის კარნახით და ოლიგარქია, ნაცვლად იმისა, რომ მრეწველობას ავითარებდეს, სამუშაო ადგილებს ქმნიდეს, ტექნოლოგიები შემოქონდეს და ამ გზით ავითარებდეს საბიუჯეტო, ეკონომიკურ მაკრო და მიკრო პარამეტრებს, კრიმინალურად პარაზიტობს ეროვნულ ვალუტას, რომელიც, ნორმალური ხელისუფლების ხელში, რეგიონში ერთ-ერთი პერსპექტიული ფულადი ერთეულია. ეს იმიტომ, რომ საქართველო უმნიშვნელოვანეს სატრანსპორტო გზებზეა და ამ გზების გარეშე ვერც ლირა, ვერც ევრო, ვერც დოლარი და ვერც მანათი ვერ გაჭაჭანდება და განვითარდება. უდიდესი პოტენციის ქვეყანა ვართ, უდიდესი ეკონომიკის პერსპექტივით. ივანიშვილების, მამაცაშვილების, ქუმსიშვილების, პაპაშვილების, ჩხარტიშვილებისა და ხაზარაძეების გარეშე, რომელთა წამალი მხოლოდ გამომძიებელი, პროკურორი, საბრალდებო დასკვნა და იზოლატორია, ეს მიღწევადია. ამის მერე დამთავრდება და დაისვენებს ქვეყანა... ამ პრობლემის მოგვარების ერთადერთი გზა არის რამდენიმე თვეში მოვიცილოთ ბანკირთა რეჟიმი ივანიშვილის თამადობით და უკან მოვატანინოთ რაც წაიღეს. ეს სტატისტიკურად ჩანს. უკანასკნელი ექვსი თვის მონაცემებით 111 მილიონი ლარის მოგება ნახეს, მათ შორის, უპირველესად „ქართუ ბანკმა“. ეს უკან უნდა გადმოირიცხოს ბიუჯეტში და დაურიგდეს ხალხს კონპენსაციად - პენსიაზე დანამატით, სოციალურ დახმარებაზე დანამატით, მრავალშვილიანობაზე დანამატითა და ხელფასზე დანამატით. ერთადერთი გზა მათი მხილება და ზარალის ანაზღაურებაა“, განაცხადა შალვა ნათელაშვილმა.