გიორგი კვირიკაშვილმა ამბროლაურის, ონის, ცაგერის, ლენტეხისა და მესტიის გაერთიანებულ საარჩევნო ოლქში „ქართული ოცნება-დემოკრატიული საქართველოს“ მაჟორიტარი დეპუტატობის კანდიდატად გოჩა ენუქიძის წარდგენის შემდეგ ამბროლაურში მხარდამჭერების წინაშე სიტყვით გამოსვლისას განაცხადა, რომ რეგიონების მოსახლეობის ინტერესები პროპორციულ სიაშიც უნდა აისახოს.

„ჩვენ განზრახული გვაქვს, რომ სხვა რაიონების მოსახლეობის ინტერესები მაქსიმალურად, შეძლებისდაგვარად დავაკმაყოფილოთ პროპორციული სიის შემადგენლობაში. მიგვაჩნია, რომ საქართველოს რეგიონები არ შეიძლება ასე მათემატიკურად დაჯამდეს. ამიტომ, სვანეთს, ლენტეხს, ცაგერს შესაძლოა ჰყავდეს პროპორციულ სიაში საკუთარი წარმომადგენლები. მთის რეგიონები მაქსიმალურად ძლიერად უნდა იყვნენ წარმოდგენილნი საქართველოს საკანონმდებლო ორგანოში“, – განაცხადა გიორგი კვირიკაშვილმა.