არასამთავრობო ორგანიზაცია „პოზიციამ“ გამოიკვლია, თუ რა თანხებს იღებდნენ პოლიტიკური სუბიექტები სააკაშვილის მმართველობის ბოლო, კონკრეტულად კი, 2008-2012  წლებში, მათ შორის რა ოდენობის იყო მაშინდელი მმართველი პარტიის „ერთიანი ნაციონალური მოძრაობის“ დაფინანსება და რამდენად შეიცვალა ამ მხრივ მდგომარეობა 2012 წლიდან, მას შემდეგ რაც ხელისუფლებაში კოალიცია „ქართული ოცნება“ მოვიდა.

„პოზიცია“-ს აღმასრულებელი დირექტორის გურამ ადამაშვილის განცხადებით, კვლევისას ცალსახად გამოიკვეთა, რომ სააკაშვილის პრეზიდენტობისას, 2013 წლის გამოკლებით, მაშინდელი მმართველი პარტია – „ერთიანი ნაციონალური მოძრაობა“ ყველაზე დიდ შემოწირულებებს იღებდა და ის ზოგიერთ შემთხვევაში 26-ჯერაც კი აღემატებოდა ყველა სხვა საარჩევნო სუბიექტის ერთად აღებულ დაფინანსებას, როგორც ამას ადგილი ჰქონდა მაგალითად, 2008 წლის საპრეზიდენტო არჩევნებში, მაშინ როცა 2013 წლის საპრეზიდენტო არჩევნებში ხელისუფლებაში მყოფი მოქალაქეთა პოლიტიკური გაერთიანების, „ქართული ოცნების“ შემოწირულება ოპოზიციური პარტიის, ნინო ბურჯანაძის „დემოკრატიული მოძრაობის“ შემოწირულებას, 2-ჯერაც კი ვერ აღემატებოდა (სხვაობა დაახლოებით, მხოლოდ 800 ათასი ლარი იყო). ხოლო, როგორც ადამაშვილი ამბობს, თუ გადავხედავთ 2016 წლის 4 თვის – იანვარ-აპრილის შემოწირულებებს, აქ თანხების მიღების მხრივ არა სახელისუფლო, არამედ ოპოზიციური პოლიტიკური პარტიები ლიდერებონ, ისეთები, მაგალითად, როგორიცაა ახლადდაფუძნებული „გირჩი“ და „პატრიოტთა ალიანსი“.

გურამ ადამაშვილის თქმით, „ერთიანმა ნაციონალურმა მოძრაობამ“, რომელიც მმართველ პარტიას წარმოადგენდა,2010 წლის 30 მაისის ადგილობრივი თვითმმართველობის არჩევნების დროს საარჩევნო კამპანიის ფონდში მთლიანი შემოწირულების 96%, 13,5 მილიონ ლარზე მეტი, საკუთარი ანგარიშიდან გადარიცხა. ამ თანხის წარმომავლობის დადგენა კი 2011 წლის თებერვლამდე ვერ მოხერხდა. მისი თქმით, 2008–2010 წლების საარჩევნო კამპანიების დაფინანსების კვლევამ დაადგინა, რომ მმართველი პარტიის წინასაარჩევნო კამპანიის დაფინანსებამინიმუმ 7-ჯერ (2010 წლის ადგილობრივი თვითმმართველობის არჩევნები) და მაქსიმუმ 26-ჯერ (2008 წლის საპრეზიდენტო არჩევნები) აღემატებოდა ყველა სხვა საარჩევნო სუბიექტის დაფინანსებათა ჯამს. რამდენიმე გამონაკლისის გარდა, ოპოზიციური პარტიები დაფინანსებას მხოლოდ ფიზიკური პირებისგან იღებენ. ბიზნესკომპანიები კი მხოლოდ მმართველი პარტიისა და მისი კანდიდატების საარჩევნო კამპანიებს აფინანსებდნენ. ასე მოხდა 2008 წლის 5 იანვრის საპრეზიდენტო და შემდგომ არჩევნებზე.

მაგალითად, თუ ავიღებთ 2012 წლის საპარლამენტო არჩევნებს, მაშინდელმა მმართველმა პარტიამ „ერთიანმა ნაციონალურმა მოძრაობამ“ ასევე ყველაზე დიდი დაფინანსება მოიპოვა. შემოწირულების სახით მან 21 მილიონ 214  868,58 ათასი ლარი მიიღო. შედარებისთვის, მაშინდელი მთავარი ოპოზიციური პარტიის „ქართული ოცნება-დემოკრატიული საქართველო“-ს შემოწირულება დაახლოებით 10-ჯერ ნაკლები იყო და ის 2 042 647,56 ლარს შეადგენდა. ჯამში კი სულ 32 საარჩევნო სუბიექტმა 32 252 335,93 ლარი მიიღო და აქედან, ყველაზე დიდი თანხა 21 214 868,58 ლარი, როგორც ეს უკვე აღინიშნა, „ნაციონალური მოძრაობის“ შემოწირულება იყო.

ხელისუფლებაში კოალიცია „ქართული ოცნების“ მოსვლის შემდეგ კი, ადამაშვილის თქმით, მდგომარეობა შეიცვალა. 2013 წელს მიღებული შემოსავლების საერთო რაოდენობით კოალიცია „ქართული ოცნება“ დაახლოებით9 მილიონი ლარით ლიდერობდა. მეორე ადგილზე იყო „ერთიანი ნაციონალური მოძრაობა“ დაახლოებით 5 მილიონი ლარით, ხოლო მესამეზე –  „დემოკრატიული მოძრაობა“ დაახლოებით 3.5 მილიონი ლარით.

„პოზიცია“-ს კვლევაში აღნიშნულია, რომ ნინო ბურჯანაძის მიერ დაფუძნებულ „დემოკრატიული მოძრაობა-ერთიანი საქართველოს“ 2013 წელს დაახლოებით 2 634 584,01 ლარის შემოწირულება ჰქონდა მიღებული, მაშინ, როცა „ქართული ოცნება-დემოკრატიული საქართველო“-ს შემოწირულება 3 391 080,99 ლარი იყო.  გურამ ადამაშვილი აღნიშნავს, რომ ამით ნათლად იკვეთება ის კარდინალურად შეცვლილი სურათი, რასაც პარტიების დაფინანსების მხრივ „ქართული ოცნების“ მმართველობისას აქვს ადგილი.

„შედარებისთვის, თუკი 2013 წლის საპრეზიდენტო არჩევნებში ხელისუფლებაში მყოფი „ქართული ოცნების“ შემოწირულება ოპოზიციური პარტიის შემოწირულებას, 2-ჯერაც კი ვერ აღემატებოდა (სხვაობა დაახლოებით, მხოლოდ 800 ათასი ლარი იყო), მაშინ როცა წინა საპრეზიდენტო არჩევნებზე, 2008 წელს „ნაციონალური მოძრაობის“ დაფინანსება მაქსიმუმ 26-ჯერ აღემატებოდა ყველა სხვა საარჩევნო სუბიექტის დაფინანსებათა ჯამს,“აცხადებს ადამაშვილი.

რაც შეეხება 2015 წელს – პოლიტიკურმა პარტიებმა 2015 წლის განმავლობაში ჯამურად 12 407 707 ლარის შემოსავალი მიიღეს. პარტიების ფინანსური საქმიანობის მონიტორინგის სამსახურის ცნობით, აღნიშნული თანხიდან ყველაზე მეტი შემოსავალი – 3 251 781 ლარი „ერთიან ნაციონალურ მოძრაობაზე“ მოდის. მეორე ადგილზეა „გაერთიანებული დემოკრატრიული მოძრაობა”, რომელმაც 1 470 484 ლარი მიიღო. მესამე ადგილზეა „ქართული ოცნება – დემოკრატიული საქართველო“, რომლის მიერ 2015 წელს მიღებულმა საბიუჯეტო და კერძო დაფინანსებამ 1 426 227 ლარი შეადგინა. 1 მილიონ ლარზე მეტი შემოსავალი ირიცხება „თავისუფალი დემოკრატების“ ანგარიშზე, რომელმაც გასული წლის განმავლობაში, შესაბამისად, 1 014 739 ლარი მიიღო.

აღსანიშნავია, რომ „პლატფორმა ახალი პოლიტიკური ცენტრისთვის“, რომელიც 2015 წლის ბოლოსკენ შეიქმნა, მაინც ახერხებს 2015 წელს სოლიდური შემოსავლების მიღებას და უკვე 2016 წლის პირველი სამი თვის მონაცემებით, იგი პირველ ადგილზეც კია.

პოლიტიკურმა პარტიებმა 2016  წლის 3 თვეში შემოწირულების სახით 428 476 ლარი მიიღეს. პარტიების ფინანსური საქმიანობის მონიტორინგის სამსახურის ინფორმაციით, აღნიშნული თანხიდან 2016 წლის იანვარში, თებერვალსა და მარტში ყველაზე მეტი შემოწირულება პლატფორმა ”ახალ პოლიტიკურ ცენტრზე” მოდის. მას 168 058 ლარი აქვს მიღებული. მე-2 ადგილზე 143 283 ლარით ”საქართველოს პატრიოტთა ალიანსია”; მე-3-ზე კი 45 070 ლარით ”გაერთიანება ბედნიერი საქართველოსთვის”.

რაც შეეხება 2016 წლის აპრილს, ყველაზე მეტი შემოწირულება – 268 500 ლარი ”საქართველოს პატრიოტთა ალიანსმა” მიიღო, 149 020 ლარით მეორე ადგილი უჭირავს ”ქართული ოცნება – დემოკრატიული საქართველოს”, მესამე კი – 124 000 ლარით ახალ პოლიტიკურ ცენტრ ”გირჩს”.

ადამაშვილი აღნიშნავს, რომ გასათვალისწინებელი ფაქტორია ის მასობრივი დაჯარიმებებიც, რასაც სააკაშვილის პრეზიდენტობისას 2012 წელს, მაშინდელი გამოკვეთილი ოპოზიციური პოლიტიკური ლიდერის ბიძინა ივანიშვილის მხარდამჭერი პირებისა თუ მისი კუთვნილი კომპანიების მიმართ ჰქონდა ადგილი. მაგალითისთვის მას მოჰყავს თბილისის საქალაქო სასამართლომ 2012 წლის ივლისში, ინტენსიური საარჩევნო კამპანიის დროს, სახელმწიფო აუდიტის სამსახურის შუამდგომლობის საფუძველზე შპს “ელიტა ბურჯი” 3,4 მილიონი ლარით დააჯარიმებისა და სხვა მსგავსი ფაქტები.

ადამაშვილი მიიჩნევს, რომ მაშინდელი ხელისუფლება გარკვეულ ზეწოლას ახდენდა, როგორც კონტროლის პალატის, შემდგომში აუდიტის სახელმწიფო სამსახურის, ისე სასამართლოს საქმიანობაზე და ძირითადად მხოლოდ ივანიშვილის კომპანიებისა და მისი მხარდამჭერების მიერ გაღებული შემოწირულებებით ინტერესდებოდა. ამგვარი ზეწოლის და უკანონო დაჯარიმებების ფაქტები კი „ქართული ოცნების“ ხელისუფლებაში მოსვლის შემდეგ არ ფიქსირდება.