საქართველოს ყოფილმა პრეზიდენტმა და ოდესის ყოფილმა გუბერნატორმა მიხეილ სააკაშვილმა ოდესის პლაჟის მიმდებარე კაფედან „ფეისბუქის“ პირდაპირ ეთერში ჩართვისას განაცხადა, რომ საქართველოში ისევ დაბრუნდა კორუფცია. მისი თქმით, თბილისის მერი კახა კალაძე „ფულს იღებს ყველა კორპუსიდან, ყველა სამშენებლო ნებართვიდან“, ხოლო ბიზნესმენები საქართველოს საბაჟოს გავლით ტვირთების შეტანაში ასევე ფულს იხდიან ქრთამის სახით.
„იცით, რა არის? კორუფცია არის სიბინძურე. აი, რომ ცხოვრობ და სახლში რომ ეჩვევი და გაჩვევენ თანდათან სიბინძურეს, ნაგავს გარშემო, ტარაკნებს, აი ასეთივეა კორუფცია“, ამბობს ყოფილი პრეზიდენტი.
სააკაშვილის განცხადებით, ბიძინა ივანიშვილი, მისი ნათესავები, პარლამენტარები, რომელთაც აიშენეს უზარმაზარი სასახლეები, მინისტრები და კალაძე, „გვაჩვევენ ჩვენ სიბინძურეში და ნაგავში ცხოვრებას“ და ყვებიან „ზღაპრებს ამავე დროს, რომ სააკაშვილი მოვა ბოროტი და ყველას ყველაფერს წაართმევს“.
საქართველოს ყოფილი პრეზიდენტი ხაზს უსვამს, რომ „ბიზნესი არის ხელშეუხებელი, ბიზნესს არავინ არ უნდა შეეხოს, ერთი თმა არ უნდა ჩამოუვარდეს, მაგრამ ქართველი ხალხისგან ოლიგარქების მიტაცებული ქონება უნდა დაუბრუნდეს ქართველ ხალხს“.
GUARDIAN.GE სრული სახით გთავაზობთ სააკაშვილის 16 ოქტომბერს ოდესიდან პირდაპირი ჩართვის, როგორც ვიდეო, ისე ტექსტობრივ ვარიანტს.
„მოგესალმებით. მე ახლა ვიმყოფები ოდესაში. ოდესიდან მოგესალმებით. ძალიან მზიანი დღეა. აქ მიყვარს ხოლმე ველოსიპედით სიარული და აქ არის ჩემი საყვარელი კაფე, სადაც შემოვდივარ და ეგრევე იციან, რომ თითო ჭიქა „სოვენიონ ბლანკი“ უნდა დავლიო ახალზელანდიური ან ოდესური, მაგრამ რატომ ჩავერთე. ცოტა ხნის წინ ამ კაფეში მოვიდა ჩემთან ერთი ადამიანი სურათის გადასაღებად და მერე მითხრა, რომ ბიზნესი ჰქონდა ბათუმში, ააშენა იქ კორპუსი და ამ კორპუსის აშენების ნებართვაში გამოართვეს ბათუმში მას ქრთამი და თქვა, რომ მე მეუბნებოდნენ, რომ საქართველოში ქრთამს არ იღებდნენ, სამწუხაროდ ჩავედი და აი, ასეთი სიტუაცია მაქვს და ქრთამი აიღესო.
„დღეს დილას მოვფრინავდი აქ, ოდესაში, თვითმფრინავით, გვერდზე გადმომიჯდა ბიზნესმენი, ამერიკელი, ფლორიდიდან და მან მითხრა, რომ შემოაქვს დიდი რაოდენობით რაღაც პროდუქტები უკრაინაშიც და საქართველოშიც და ადრეო, თქვენ დროში საქართველოში სამოთხე იყოო, მერე კიდევ 2-3 წელი გაგრძელდაო, ბოლო 2 წელი ინტენსიურად იღებენ ქრთამებს ისევ საბაჟოზეო და მაინც სიტუაცია ცოტა ჯობია უკრაინასო, მაგრამ ქრთამები და კორუფცია დაიწყო მთელი მასშტაბითო.
„ერთი დეველოპერი ბათუმური, ამას წინათ გადავიკვეთეთ კიევში და მითხრა, რომ თბილისში კორპუსის აშენებაზე კალაძეს გადაუხადა ფული და საერთოდ კალაძე ფულს იღებს ყველა კორპუსიდან, ყველა სამშენებლო ნებართვიდან.
„მე ამას იმიტომ გიყვებით, რომ ახლა ბევრი დისკუსიაა, უნდა შერჩეთ, თუ არ უნდა შერჩეთ. აი, აქ, გვერდზე არის, ახლაც არის ხალხი, ბანაობს ოქტომბრის შუა რიცხვებში, პლაჟი, რომელსაც ოდესელები ეძახიან სააკაშვილის პლაჟს. ეს არის ძალიან ლამაზი ადგილი, მიტაცებული ჰქონდა ერთ კიეველ მილიარდერს და როდესაც მე აქ გავხდი გუბერნატორი, მივედი, ბულდოზერებით ჩამოვხსენი ეს ღობე, გავუხსენი ხალხს, დავიწყეთ ამ პლაჟის მოწყობა და დაარქვეს ოდესელებმა სააკაშვილის პლაჟი და რამდენიმე ასეთი პლაჟი დავუბრუნე მე ოდესელებს, რომელიც მიტაცებული ჰქონდათ ადგილობრივ თუ კიეველ ოლიგარქებს.
„ახლა მე მინდა გკითხოთ. უფრო სამართლიანი იქნებოდა, რომ გვეთქვა, რომ ყველას ყველაფერი უნდა შერჩეს, ეს პლაჟი უნდა იყოს ოლიგარქის საკუთრებაში? სამართლიანი იქნება თუ არა ის, რომ ივანიშვილს შერჩეს ბოტანიკური ბაღი, რომლის დიდი ნაწილი მიიტაცა. სამართლიანი იქნება თუ არა, ივანიშვილს შერჩეს დენდროპარკი, რომელიც ამოთხარა და მთელი საქართველო გადათხარა; სამართლიანი იქნება თუ არა.. თუ სამართლიანი იქნება ის, რომ ეს დაუბრუნდეს ქართველ ხალხს და ზღვა დაუბრუნდეს თავის ნაპირებს და არა ისე, როგორც ივანიშვილმა მიიყვანა თავის სახლთან და მიწა დაფარა. სამართლიანი იქნება თუ არა, რომ ის რაც გაძარცვეს...
„იცით, რა არის? კორუფცია არის სიბინძურე. აი, რომ ცხოვრობ და სახლში რომ ეჩვევი და გაჩვევენ თანდათან სიბინძურეს, ნაგავს გარშემო, ტარაკნებს, აი ასეთივეა კორუფცია. აი, ეს ყველა - ივანიშვილი, მისი ნათესავები, ეს ყველა პარლამენტარი, რომელთაც აიშენეს უზარმაზარი სახლები, სასახლეები, ეს მინისტრები, ეს კალაძე, ისინი გვაჩვევენ ჩვენ სიბინძურეში და ნაგავში ცხოვრებას. თქვენ სუნი არ გაწუხებთ? და გიყვებიან ზღაპრებს ამავე დროს, რომ სააკაშვილი მოვა ბოროტი და ყველას ყველაფერს წაართმევს. ბიზნესი არის ხელშეუხებელი. ბიზნესს არავინ არ უნდა შეეხოს, ერთი თმა არ უნდა ჩამოუვარდეს, მაგრამ ქართველი ხალხისგან ოლიგარქების მიტაცებული ქონება, რა თქმა უნდა, უნდა დაუბრუნდეს ქართველ ხალხს. და რა თქმა უნდა, ამ ხალხმა უნდა აგოს პასუხი სამართლიანი, საერთაშორისო მოსამართლეებით დაკომპლექტებული სასამართლოს წინაშე. და რა არის აქ უჩვეულო და განსაკუთრებული?
„აი, ახლა ჰკითხეთ ახლა იმ ოდესელებს, ვინც ამ პლაჟზე სხედან, არიან თუ არა ბედნიერები, რომ ეს პლაჟი მათ დაუბრუნდათ და შეუძლიათ მოვიდნენ და სრულიად უფასოდ დაჯდნენ ქალაქის საუკეთესო ნაწილში, რომელიც წაღებული ჰქონდათ იმათ. ზუსტად ასევეა საქართველოშიც. და ისინი სააკაშვილზე რომ ყვებიან ამას, პრაქტიკულად თქვენსა და თქვენს კეთილდღეობას შორის, თქვენსა და უკეთეს ცხოვრებას შორის დგას ეს კორუფცია და მათი ბინძური პროპაგანდა. თქვენსა და ჩემს შორის დგანან ისინი. მაგრამ მე რომ გამწიონ გვერდზე, ხვალ შეიძლება გავქრე მე საერთოდ, აღარ ვიარსებო, მაგრამ თქვენსა და თქვენს მომავალს შორის, თქვენსა და უკეთეს ცხოვრებას შორის ისინი ხომ ამ კორუფციით გძარცვავენ ყოველდღიურად. ისინი ხომ ლახავენ საქართველოს სახელს. საქართველოს ხომ ძალიან მაგარი სახელი ჰქონდა. თავმოყვარეობის საკითხია, რომ ისევ აქ ალაპარაკდნენ, რომ საქართველოში არის კორუფცია. მართლა უნდა დავამთავროთ ეს ყველაფერი. საქართველოში უნდა გათენდეს და ამას წყალი არ გაუვა“, განაცხადა სააკაშვილმა.
მოგესალმებათ საინფორმაციო სააგენტო GUARDIANGE-ის ადმინისტრაცია და გაცნობებთ, რომ სააგენტოს განახლების შედეგად, ამიერიდან ვებგვერდის ძველ ვერსიაზე -WWW.GUARDIAN.GE ხელმისაწვდომი იქნება 2023 წლის 7 სექტემბრამდე განთავსებული საინფორმაციო ხასიათის წერილობითი/ფოტო/ვიდეო მასალა, ხოლო განახლებული სააგენტოს ვებგვერდს შეგიძლიათ გაეცნოთ WWW.GUARDIANGE.COM-ზე.
ამერიკის შეერთებული შტატების არჩეულმა პრეზიდენტმა დონალდ ტრამპმა ჯანდაცვისა და სოციალური მომსახურების მდივნად ვაქცინაციის მიმართ სკეპტიკურად განწყობილი რობერტ ფიცჯერალდ კენედი უმცროსი, პრეზიდენტ ჯონ კენედის ძმისშვილი დაასახელა, რითაც დაასრულა დიდი ხნის მითქმა-მოთქმა კენედის გარშემო იმის შესახებ, თუ რა თანამდებობას დაიკავებდა იგი ტრამპის ადმინისტრაციაში.