„ნატო-მ საჭიროა აჩვენოს, რომ მას ჰყავს ძლიერი სამხედრო წარმომადგენლობა მის აღმოსავლეთ ფლანგზე“,- განაცხადა გერმანიის კანცლერმა, ანგელა მერკელმა ბერლინში კანონმდებლების წინაშე სიტყვით გამოსვლისას.

აღნიშნულ ინფორმაციას „დოიჩე ველე“ ავრცელებს.

მერკელის თქმით, "საზღვრების ხელშეუხებლობის" კითხვის ნიშნის ქვეშ დაყენებით მოსკოვმა დასავლეთის თვალში ნდობა დაკარგა.

„რუსეთმა აღმოსავლეთით ჩვენს მოკავშირეებს სიმშვიდე დაურღვია მისი უკრაინაში მოქმედებების გამო“,-განაცხადა მერკელმა და დასძინა, რომ მათ ახლა სჭირდებათ ნათლად დარწმუნება ალიანსის მეშვეობით.

გერმანიის კანცლერმა დაჟინებით მოუწოდა ნატო-ს სხვა წევრ ქვეყნებს, თვალშისაცემი და დამაჯერებელი სოლიდარობა გამოხატონ.

გამოცემის ცნობით, მერკელის სიტყვით გამოსვლა ერთი დღით ადრე უსწრებს ნატო-ს სამიტს ვარშავაში, სადაც მოელიან, რომ ალიანსის წევრი ქვეყნები დაამტკიცებენ, ცივი ომის დასრულების შემდგომ, ყველაზე დიდ და ფართო სამხედრო მშენებლობას აღმოსავლეთ ევროპაში. გერმანია მომავალ წელს ლიტვაში ნატო-ს 1 000-მდე ჯარისკაცის კოორდინირებას მოახდენს. ბერლინი ასევე, გაზრდის თავის თავდაცვის ხარჯებს.

ნატო-ს კარი ჯერ კიდევ ღიაა

მერკელმა აშშ-ს მადლობა გადაუხადა იმისათვის, რომ „მან აიღო მთავარი ტვირთი მსოფლიო მასშტაბით ნატო-ს ჯარების განლაგების გამო“.

გერმანიის კანცლერმა ასევე, შეაქო ნატო-ს აღმოსავლეთით გაფართოება, რომლის შემადგენლობაშიც მალე მონტენეგროს იხილავენ.

გამოცემა ასევე, აღნიშნავს, რომ უკრაინამ და საქართველომაც სთხოვეს ალიანსს, რომ დაიცვან ისინი რუსეთის საფრთხისაგან.

„ჩვენ არ ვხურავთ ნატო-ს კარს“,-განაცხადა მერკელმა, თუმცა არ დაუსახელებია ნატო-ს მომავალი წევრები.

გერმანიის მთავრობის მეთაურმა აღნიშნა, რომ მოსკოვთან ურთიერთობისას „შეკავებისა და დიალოგის“ პოლიტიკის წარმართვაა საჭირო და დაამატა, რომ „ისინი [შეკავება და დიალოგი] არ ეწინააღმდეგება ერთმანეთს და ისინი ნამდვილად განუყოფელია“.

მერკელმა ასევე, ხაზი გაუსვა, რომ „უსაფრთხოება ევროპაში, შესაძლოა, მიღწეული იყოს მხოლოდ რუსეთთან თანამშრომლობით და არა მის წინააღმდეგ წასვლით“.