მომღერალი ჯორჯ მაიკლი 53 წლის ასაკში გარდაიცვალა. ინფორმაციას BBC ავრცელებს.

ვარსკვლავი, რომელმაც თავისი კარიერა 1980-იან წლებში დაიწყო და წარმატებით განაგრძო, როგორც სოლო შემსრულებელმა, გორინგში, ოქსფორდშირში „საკუთარ სახლში წყნარად გარდაიცვალა“.

„თემზის ხეობის პოლიციამ“ განაცხადა, რომ ისინი ჯორჯ მაიკლის სიკვდილს განიხილავენ როგორც აუხსნელს, მაგრამ საეჭვო გარემოებები არ არსებობს.

ჯორჯ მაიკლის პუბლიცისტის მიერ გავრცელებულ განცხადებაში ნათქვამია: „დიდი მწუხარებით ვადასტურებთ, რომ ჩვენი საყვარელი შვილი, ძმა და მეგობარი ქრისტეშობის პერიოდში სახლში წყნარად გარდაიცვალა.

„ოჯახის თხოვნაა პატივი ეცეს მათ პირად ცხოვრებას ამ მძიმე და ემოციურ მომენტში. ამ ეტაპზე დამატებითი კომენტარი არ იქნება“.

სერ ელტონ ჯონმა „ინსტაგრამზე“ მაიკლთან ერთად გადაღებული ფოტო გამოაქვეყნა და დაწერა: „ღრმა შოკში ვარ. მე დავკარგე საყვარელი მეგობარი - ყველაზე კეთილი, ყველაზე დიდსულოვანი არსება და ბრწყინვალე არტისტი. ჩემი გული მის ოჯახსა და ყველა მის გულშემატკივართანაა“. 

პოლიციამ განაცხადა: „ამ ეტაპზე სიკვდილი განიხილება როგორც აუხსნელი, მაგრამ არა საეჭვო.

„მოხდება გვამის სათანადო გაკვეთა. თემზის ხეობის პოლიციისგან ახალი ინფორმაცია არ იქნება გამოქვეყნებული, ვიდრე ცხედრის გაკვეთა არ მოხდება“.

მაიკლმა, რომელიც ჩრდილოეთ ლონდონში დაიბადა, როგორც გეორგიოს კირიაკოს პანაიოტოუ, 100 მილიონზე მეტი ალბომი გაყიდა მთელი მისი თითქმის 4 ათეული წლის კარიერის განმავლობაში.