შეერთებული შტატების არჩეულმა პრეზიდენტმა, დონალდ ტრამპმა სადაზვერვო სამსახურების მაღალი რანგის ოფიციალურ პირებთან შეხვედრამდე, რომლის მიზანია ტრამპისათვის ანგარიშის მოხსენება რუსეთის მიერ ამერიკის არჩევნებში ჩარევის თაობაზე, საკამათოდ ქცეული რუსული ჰაკერული ჩარევა, „ნიუ იორკ თაიმსთან“ სატელეფონო ინტერვიუს დროს „პოლიტიკურ კუდიანზე ნადირობად“ შეაფასა.

„ჩინეთი, საკმაოდ ახლახან, ჰაკერულად დაესხა თავს 20 მილიონ სამთავრობო სახელებს“, თქვა ტრამპმა the New York Times-თან სატელეფონო ინტერვიუში, მხედველობაში ჰქონდა პერსონალურ მონაცემთა მართვის ოფისის ბაზაზე შეღწევა 2014 და 2015 წლებში. „როგორ არავინ ლაპარაკობს ამაზე? ეს არის პოლიტიკურ კუდიანზე ნადირობა“.

„მე არ მინდა ქვეყნებმა ჩვენ ქვეყანაზე ჰაკერული თავდასხმა განახორციელონ. ისინი ჰაკერულად დაესხნენ თავს თეთრ სახლს. ისინი ჰაკერულად დაესხნენ თავს კონგრესს. ჩვენ მსოფლიოს ჰაკერულ დედაქალაქს ვგავართ“, - განაცხადა დონალდ ტრამპმა, რომელმაც სადაზვერვო სამსახურებისადმი უნდობლობა არაერთხელ გამოხატა და რუსეთის ამერიკის არჩევნებზე შესაძლო ჩარევას „სასაცილო“ უწოდა.

ამ წუთებში კი დონალდ ტრამპი შეერთებული შტატების სადაზვერვო სამსახურების ხელმძღვანელ პირებს ხვდება. (შეხვედრა პარასკევს, ნიუ იორკის დროით დღის 12:30 საათზე დაიწყო) როგორც წინასწარ არის ცნობილი, იგი სადაზვერვო ოფიციალურ პირებს შეკითხვებს დაუსვამს იმასთან დაკავშირებით თუ რა მეთოდებით გამოიკვლიეს მათ საკითხი და როგორ მივიდნენ გარკვეულ დასკვნებამდე.

ამასობაში კი უკვე ცნობილი გახდა, რომ შეერთებულმა შტატებმა იმ რუსი აგენტების იდენტიფიცირება მოახდინა, რომელთაც ამერიკის საპრეზიდენტო არჩევნებზე ჩარევის მიზნით ჰაკერული თავდასხმა განახორციელეს. ამის შესახებ BBC წერს.

აგენტებმა, რომელთა ვინაობა არ სახელდება, სავარაუდოდ, „დემოკრატების“ ელქტრონული წერილები „ვიკილიქსისთვის“ მოიპარეს, რათა არჩევნების სასწორის ტრამპის სასარგებლოდ გადახრა ეცადათ.

რუსეთი უარყოფს ამერიკის არჩევნებზე რაიმე სახის ჩარევას და „ვიკილიქსის“ დამფუძნებელმა ჯულიან ასანჯმა განაცხადა, რომ მოსკოვი არ ყოფილა წყარო.

არჩეული პრეზიდენტი დონალდ ტრამპი, რომელიც ასევე არ ენდობა ამერიკულ დაზვერვას, ამ წუთებში სადაზვერვო სამსახურების ოფიციალური პირებისაგან უშუალოდ ისმენს ანგარიშს, რომელმაც აშშ-ის არჩევნებზე რუსი ჰაკერების ჩარევა დაადასტურა.

ტრამპამდე ერთი დღით ადრე კი აღნიშნული ანგარიში პრეზიდენტ ობამას ჩაბარდა, რის შემდეგაც შეერთებული შტატების ვიცე-პრეზიდენტმა ჯო ბაიდენმა არჩეულ პრეზიდენტს, დონალდ ტრამპს უთხრა, „გაიზარდოს“, და გააკრიტიკა მისი თავდასხმები სადაზვერვო საზოგადოებაზე, კერძოდ კი იმის გამო, რომ მას ეჭვები გააჩნია რუსების ჩარევაზე და „თვითერზე“ არაერთხელ გააკრიტიკა სადაზვერვო სააგენტოები.

ბაიდენმა განაცხადა, რომ „აბსოლუტური უგუნურებაა“ პრეზიდენტს არ გააჩნდეს რწმენა სადაზვერვო სააგენტოებისადმი.

„პრეზიდენტს არ გააჩნდეს ნდობა, არ იყოს მზად მოუსმინოს უამრავ სადაზვერვო სააგენტოს, თავდაცვის დაზვერვიდან მოყოლებული, დამთავრებული ცენტრალური სადაზვერვო სააგენტოთი (CIA), აბსოლუტური უგუნურებაა“, - განაცხადა ბაიდენმა PBS-ისთვის მიცემულ ინტერვიუში.

„იდეა, რომ შენ შესაძლოა იცოდე მეტი, ვიდრე სადაზვერვო საზოგადოებამ იცის - ეს ჰგავს იმას, რომ თქვა, მე ვიცი მეტი ფიზიკის შესახებ, ვიდრე ჩემმა პროფესორმა. მე არ წამიკითხავს წიგნი, მე უბრალოდ ვიცი, ვიცი მეტი“, - აღნიშნა ჯო ბაიდენმა.

როდესაც ჰკითხეს, თუ რას ფიქრობდა იგი ტრამპის რეგულარული თავდასხმების შესახებ „თვითერზე“, ბაიდენმა თქვა: „გაიზარდე დონალდ, გაიზარდე, დროა იყო ზრდასრული, შენ პრეზიდენტი ხარ. დროა რაღაც გააკეთო. გვიჩვენე, რა შეგიძლია“.

ხუთშაბათს, ეროვნული სადაზვერვო სამსახურის დირექტორმა, გენერალმა ჯეიმს კლაპერმა, სენატის შეიარაღების კომიტეტზე მოსმენებისას განაცხადა, რომ ჰაკერული თავდასხმის ბრძანება რუსეთის პრეზიდენტმა, ვლადიმერ პუტინმა გასცა და მოტივი მომავალ კვირას გამჟღავნდება.