საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის თავმჯდომარის, გიორგი სეთურიძის განცხადებით, თბილისი–სენაკი–ლესელიძის საავტომობილო გზის 188-ე კმ-ზე სოფელ შორაპანთან მოძრაობა აღდგენილია.

როგორც Guardian.ge-სთან საუბრისას სეთურიძემ აღნიშნა, მოძრაობა დასაშვებია მხოლოდ მსუბუქი ავტოტრანსპორტისთვის, მისაბმელიანი და ნახევრადმისაბელიანი ტრანსპორტისთვის კი დაწესებული რეჟიმის მოხსნა მას შემდეგ მოხდება, რაც ადგილი გეოლოგიურად შემოწმდება.

სეთურიძის თქმით, სოფელ შორაპანთან ჩამოწოლილი მიწა-კლდოვანი მასის გაწმენდა წუხელვე მოხდა, თუმცა, მისივე განცხადებით, გამომდინარე იქედან, რომ ღამე საფრთხის არსებობის შესახებ გეოლოგიური შეფასება ვერ მოხერხდა, "ამიტომ სრულად არ გამოცხადდა ის, რომ მოძრაობა აღდგენილია".

"დაახლოებით, 45-50 მეტრი სიმაღლის მთა მოწყდა და დიდი ლოდებისა და მიწის მასა ჩამოვიდა გზის სავალ ნაწილზე და მთლიანად გადაკეტა მოძრაობა. წუხელ მობილიზებული იქნა ყველა საჭირო ტექნიკა და ღამის საათებში უკვე, ფაქტობრივად, გზა უკვე გაწმენდილი იყო, მაგრამ გამომდინარე იქედან, რომ ღამის საათებში გეოლოგიურად შეფასება არსებული ვითარების რთულია, ამიტომ სრულად არ გამოცხადდა ის, რომ მოძრაობა აღდგენილია.

ამ წუთებში მანქანები მოძრაობენ, ასევე მიმდინარეობს გეოლოგიური კვლევა. დიდი პრობლემური მეწყერული წარმონაქმნია და ალბათ, უახლოეს დღეებში მოგვიწევს კონკრეტული გეგმისა და პროექტის შემუშავება, თუ როგორ უნდა მოხდეს სტაბილიზაცია ქვების, რომლებიც პრობლემას არასდროს არ ქმნიდა. ვიმუშავებთ ძალიან ფრთხილად, რომ რაიმე კიდევ არ მოხდეს.

მოძრაობა გახსნილია, დილამდე მონაკვეთზე შეჩერებული ავტომანქანების გატარება მოხდა. გომი-საჩხერე-ჭიათურა-ზესტაფონის მონაკვეთზეც მიმდინარეობს მოძრაობა. რადგან ჯერ ზუსტად არ არის შეფასებული გეოლოგიურად, არსებობს თუ არა რაიმე საფრთხე კიდევ, ხომ შეიძლება ლოდი მოწყდეს კიდევ და უბედური შემთხვევა გამოიწვიოს, ახლა მიმდინარეობს დათვალიერება და შემდეგ ოფიციალურად გამოცხადდება, როდის გაეშვებიან დიდი მანქანებიც.

იმ საფრთხის შეფასების შემდეგ, რომელიც შეიძლება დაემუქროს ამ მონაკვეთზე მიმავალ ავტოტრანსპორტს, მოხდება დაწესებული რეჟიმის ოფიციალურად მოხსნა", - განუცხადა Guardian.ge-ს გიორგი სეთურიძემ.

საავტომობილო გზების დეპარტამენტის თავმჯდომარის განცხადების, რომ მსუბუქი ავტომანქანებისთვის თბილისი–სენაკი–ლესელიძის საავტომობილო გზის 188-ე კმ-ზე (სოფ. შორაპანთან) მოძრაობა აღდგენილია, საპირისპიროს აცხადებენ მგზავრები, რომლებიც Guardian.ge-ს დაუკავშირდნენ. მათი ინფორმაციით, გომთან საპატრულო პოლიცია დგას და დასავლეთ საქართველოს მიმართულებით არანაირი სახის ავტოტრანსპორტს არ ატარებენ და მათ გომი-საჩხერე-ჭიათურა-ზესტაფონის გზის გავლით უწევთ გადაადგილება. აღნიშნულ მონაკვეთზე კი მოძრაობა გადატვირთულია და დიდი საცობებია შექმნილი.