შარზეა ყველა, ვინც ახლა ამბობს, რომ თურმე ხელისუფლება რაღაცაში ერევა, თურმე რაღაცებს აპანიკებს მოსახლეობას, - აღნიშნული განცხადება საპარლამენტო უმრავლესობის წევრმა, ზვიად ძიძიგურმა „რუსთავი 2"-თან საუბრისას გააკეთა.

მისი თქმით, საპატრიარქოს ირგვლივ განვითარებულ მოვლენებთან დაკავშირებით, „ძალიან ოპერატიული და კარგი საქმიანობა ჩაატარა ხელისუფლებამ და მხოლოდ მადლობა ეკუთვნის".

„პროკურატურამ მიაკვლია პიროვნებას, რომელიც საწამლავით ხელში მიდიოდა გერმანიაში, მიდიოდა იმ კლინიკაში, სადაც პატრიარქი იმყოფებოდა, იმოქმედა ოპერატიულად, დააკავა ეს ადამიანი, არც აპირებდა პროკურატურა რაიმე ტიპის განცხადების გაკეთებას, მაგრამ ეს ინფორმაცია გახდა საჯარო, გავიდა საჯარო სივრცეში. ასევე გახდა საჯარო ის, რომ სპეციალური დაცვის სამსახურის უფროსი ბატონი ანზორ ჩუბინიძე ჩავიდა იმიტომ, რომ პატრიარქი სადაც იმყოფებოდა იქ უნდა ყოფილიყო ეს პიროვნება და დაცვის ზომები გააძლიერა. ამისთვის ძალიან ოპერატიული და კარგი საქმიანობა ჩაატარა ხელისუფლებამ და მხოლოდ მადლობა ეკუთვნის.

შარზეა ყველა ვინც ახლა ამბობს, რომ თურმე ხელისუფლება რაღაცაში ერევა, თურმე რაღაცებს აპანიკებს მოსახლეობას ა.შ. რომ არ გაეკეთებინა პროკურატურას ეს განცხადება, მაშინ როგორი მითქმა-მოთქმა ატყდებოდა. ანუ გაკეთდა განცხადება, რომ ეკლესიის წინააღმდეგ იგეგმებოდა შეთქმულება და ეს შეთქმულება იქნა ჩაშლილი და ძალიან მნიშვნელოვანია და ძალიან სწორია, რომ ამაზე ხელისუფლება რეაგირებს. დანარჩენზე ყველაფერზე პასუხი უნდა გასცეს გამოძიებამ. მთავარი ვინც არის ჯერ ის დუმილის უფლებას იყენებს და ამ დროს მე ვერსიები მოვისმინე, თურმე საპატრიარქოში გადატრიალებას გეგმავენ, ვისი მოკვლა უნდათ მთელი სია ჩამოთვალეს.... პრემიერიც და ყველა ვადასტურებთ იმას, რომ საშინელება შეიძლება მომხდარიყო და ეს იქნა თავიდან აცილებული, რა არის ამაში გაუგებარი,“ - განაცხადა ძიძიგურმა „რუსთავი 2"-თან საუბრისას.