დუშეთის მუნიციპალიტეტმა, თიანეთისა და კასპის მუნიციპალიტეტებთან ერთად, ევროპის საბჭოს მიერ გამოცხადებულ საგრანტო კონკურსში „ადგილობრივი ინიციატივები ეთიკური და გამჭვირვალე მმართველობისათვის'' გაიმარჯვა.

როგორც Guardian.ge-ს დუშეთის გამგეობიდან აცნობეს, მუნიციპალიტეტის მიერ წარდგენილი პროექტის, „გახდი გადაწყვეტილების მიმღები პირი ადგილობრივი თვითმმართველობის პროცესში'' პრეზენტაციის შემდეგ, 1-ელ მარტს ევროპის საბჭოს სათაო ოფისში, საზეიმო ვითარებაში ხელი საპროექტო წინადადების ფარგლებში გრანტის მიღების შესახებ შეთანხმებას მოეწერა. აღნიშნულთან დაკავშირებით, დუშეთის მუნიციპალიტეტის გამგებელი ვაჟა ჩოხელი თანაშემწესთან, თინათინ ცოცხალაშვილთან ერთად, სტრასბურგში ოფიციალური ვიზიტისას, დაესწრო ევროპის საბჭოს მიერ დაგეგმილ შეხვედრას „ინსტიტუციონალური ჩარჩოების გაძლიერება ადგილობრივი თვითმმართველობებისათვის'', რომელიც საქართველოსთვის 2015-2017 წლის აღმოსავლეთ პარტნიორობის პროგრამის სამოქმედო გეგმის ნაწილია და ევროპის საბჭოს ადგილობრივი და რეგიონული ხელისუფლებების კონგრესის მიერ ხორციელდება.

ღონისძიებას აღმოსავლეთ პარტნიორობის ოთხი ქვეყნის (საქართველო, უკრაინა, სომხეთი, მოლდოვა) თორმეტ დელეგაციასთან ერთად, ევროპის საბჭოს კონგრესის გენერალური მდივანი ანდრიას კიფერი, თანამშრომლობის პროგრამის მენეჯერი მარიტე მორასი, ევროკავშირის დელეგაციის თავმჯდომარის მოადგილე ხოსე მენდეს ბოტა და სხვა ოფიციალური პირები ესწრებოდნენ.

ანდრეას კიფერის განცხადებით, ეს ხელს შეუწყობს მერებს/გამგებლებს, როგორც ადგილობრივ ლიდერებს, „გამოიყენონ ახალ ეტაპზე გადასვლის შესაძლებლობა და განახორციელონ კონკრეტული ღონისძიებები ადგილობრივი დემოკრატიის ხარისხის გასაუმჯობესებლად საკუთარ ქვეყნებში".

მისივე თქმით, „ჩვენ, ადგილობრივი და რეგიონული ხელისუფლებების კონგრესის წევრები ვამაყობთ, რომ შეგვიძლია თქვენი პოლიტიკური პლატფორმისა და სამუშაო ჩარჩოს უზრუნველყოფა განვითარების ამ გზაზე.''

ხელმოწერის ცერემონიამდე, მერებმა/გამგებლებმა საკუთარი საპროექტო ინიციატივების შესახებ კოლეგებთან, ეროვნულ ასოციაციებთან, ადგილობრივ და რეგიონულ ექსპერტებთან და ხელმძღვანელებთან ერთად იმსჯელეს და ერთობლივი ჩართულობით, პროექტის იმპლემენტაციის შემდგომი ნაბიჯები დაგეგმეს.