გერმანიის კანცლერმა ანგელა მერკელმა განაცხადა, რომ ევროპა უკვე „სრულად ვერ იქნება მინდობილი“ შეერთებულ შტატებსა და დიდ ბრიტანეთზე, მას შემდეგ რაც პრეზიდენტად დონალდ ტრამპია არჩეული და „ბრექსიტი“ სახეზეა - ბრიტანეთი ევროკავშირიდან გადის.

მერკელმა თქვა, რომ მას უნდოდა მეგობრული ურთიერთობები ორივე ქვეყანასთან, ისევე როგორც რუსეთთან, მაგრამ ევროპამ ახლა უნდა „იბრძოლოს თავისი საკუთარი ბედ-იღბლისთვის“.

(მერკელი ბავარიული ლუდის კარავში საუბრობდა)

მერკელის ეს განცხადება 2015 წლის პარიზის კლიმატის ცვლილებაზე მიღწეული შეთანხმების თაობაზე დიდი შვიდეულის შიგნით 6 სახელმწიფოს ლიდერის გამოხატული ერთსულოვნებისადმი - 7-ს მინუს 1 - ტრამპის მიერ ცივი წყლის გადასხმას მოჰყვა, რომელმაც მისი პოზიციის დაფიქსირება მომავალი კვირებისთვის გადადო. კანცლერმა აღნიშნა, რომ იტალიაში გამართული „მოლაპარაკებები ძალიან რთული“ იყო.

„დროება, რომელშიც ჩვენ სრულად შეიძლება ვიყოთ მინდობილი სხვებზე, წარსულს ბარდება. მე ეს გამოვცადე ბოლო რამდენიმე დღეში“, უთხრა მერკელმა საარჩევნო კამპანიაზე შეკრებილ საზოგადოებას მიუნხენში, სამხრეთ გერმანიაში, როგორც ამას BBC იუწყება.

ბრიტანული სამაუწყებლო კორპორაციის (BBC) კორესპონდენტის დამიენ მაკგინესის თქმით, მერკელის კომენტარები ევროკავშირის შიგნით საკუთარ თავში დარწმუნებულობის მზარდი ნიშანია.

მერკელმა თქვა, რომ ურთიერთობებში პრიორიტეტი ბერლინსა და საფრანგეთის ახალარჩეულ პრეზიდენტ ემანუელ მაკრონს შორის უნდა იყოს.