საუდის არაბეთმა, ეგვიპტემ, ბაჰრეინმა და არაბეთის გაერთიანებულმა საამიროებმა ყატართან დიპლომატიური ურთიერთობები გაწყვიტეს, ბრალი დასდეს რა მას რეგიონის დესტაბილიზაციაში.

აღნიშნული 4 ქვეყნის განცხადებით, ყატარი მხარს უჭერს ტერორისტულ დაჯგუფებებს, მათ შორის მუსულმანთა საძმოს.

როგორც BBC საუდის არაბეთის ახალი ამბების სააგენტო SPA-ზე დაყრდნობით იუწყება, ელ-რიადმა თავისი საზღვრები ჩაკეტა, გაწყვიტა სახმელეთო, საზღვაო და საჰაერო კავშირები - განაცხადა რა, რომ იგი „იცავს მის ეროვნულ უსაფრთხოებას ტერორიზმის და ექსტრემიზმის საფრთხეებისაგან“.

ეგვიპტის საგარეო საქმეთა სამინისტროს განცხადებით, ქაირომ ყატარის ყველა სატრანსპორტო საშუალებისთვის თავისი საჰაერო სივრცე და პორტები დაკეტა.

არაბეთის გაერთიანებულმა საამიროებმა და ბაჰრეინმა ყატარის დიპლომატებს 48 საათი მისცეს ქვეყნის დასატოვებლად. აბუ დაბი ბრალს სდებს დოჰას „ტერორიზმის, ექსტრემიზმის და სექტანტური ორგანიზაციების მხარდაჭერასა და დაფინანსებაში“, ნათქვამია საინფორმაციო სააგენტო WAM-ის მიერ გავრცელებულ ინფორმაციაში.

ბაჰრეინის სახელმწიფო საინფორმაციო სააგენტოს განცხადებით, ქვეყანა წყვეტს დიპლომატიურ ურთიერთობებს ყატართან „ბაჰრეინის უსაფრთხოების და სტაბილურობის შერყევისა და მის საქმეებში ჩარევის გამო“.

საუდის არაბეთის ხელმძღვანელობით შექმნილმა კოალიციამ, რომელიც იემენში ჰუსიტების მეამბოხეებს ებრძვის, ასევე გააძევა ყატარი თავისი ალიანსიდან იმის ბრალდებით, რომ დოჰა მხარს უჭერს ტერორისტულ დაჯგუფებებს „მათ შორის ალ-ყაიდას და დაეშს, რომელიც ასევე ცნობილია როგორც „ისლამური სახელმწიფო“, და აგრეთვე საქმე აქვს დაჭერილი ამბოხებულთა მილიციასთან“.