სამაუწყებლო კომპანია „რუსთავი 2“-ის გენერალური დირექტორის მოადგილე, საინფორმაციო პროგრამა „კურიერის“ წამყვანი ზაალ უდუმაშვილი, რომელიც კიევიდან დაბრუნდა, ადასტურებს ინფორმაციას იმის შესახებ, რომ უკრაინის დედაქალაქში საქართველოს ყოფილ პრეზიდენტთან, მიხეილ სააკაშვილთან გამართული შეხვედრისას მისი თბილისის მერის არჩევნებში მონაწილეობის საკითხი განიხილებოდა, თუმცა აცხადებს, რომ მას ჯერ არ აქვს გადაწყვეტილება მიღებული, იქნება თუ არა „ნაციონალური მოძრაობის“ მერობის კანდიდატი დედაქალაქში.

„მაქვს შემოთავაზება, რომ თბილისის მერის არჩევნებში მივიღო მონაწილეობა, თუმცა გადაწყვეტილებას მე ალბათ უახლოეს დღეებში გამოვაცხადებ“, განაცხადა ზაალ უდუმაშვილმა და აღნიშნა, რომ შეთავაზება „ნაციონალური მოძრაობისაგან“ მიიღო.

მისი თქმით, მას უკრაინაში შეხვედრები პარტიის ლიდერებთან და მათ შორის მიხეილ სააკაშვილთან ჰქონდა და საუბარი ეხებოდა მის კანდიდატურას თბილისის მერის არჩევნებში. „მე ავიღე გარკვეული დრო მოსაფიქრებლად. გადაწყვეტილება ჯერ არ მიმიღია საერთოდ ვიყრი თუ არა კენჭს, გადაწყვეტილება არც იმაზე არ მიმიღია, ვიქნები თუ არა „ნაციონალური მოძრაობის“ კანდიდატი და ვიქნები დამოუკიდებელი კანდიდატი. როგორც გეუბნებით, ჩემს გადაწყვეტილებას უახლოეს დღეებში გამოვაცხადებ“, უთხრა ჟურნალისტებს ზაალ უდუმაშვილმა.