საქართველოს ენერგეტიკის მინისტრი, ვიცე-პრემიერი კახა კალაძე საკუთარ სახლში ჩაწერილ ვიდეომიმართვაში აცხადებს, რომ დღეს დაბრუნდა ყაზახეთიდან, სადაც ექსპო-2017 წლის გახსნაზე იმყოფებოდა და სურს გამოეხმაუროს თბილისში გამართულ საპროტესტო აქციას.

კალაძემ აღნიშნა, რომ „მიუღებელია, როცა ძალოვანი სტრუქტურის თანამშრომლის მხრიდან თუნდაც ეჭვის დონეზე უშვებ ნარკოტიკის ჩადების შესაძლებლობას“ და „ეს ყველაფერი წარსულში უნდა დარჩეს“. მან იმედი გამოთქვა, რომ „სტრუქტურის ხელმძღვანელობა გააკეთებს ყველაფერს, რომ თუკი ვინმე არის დამნაშავე ან თუ ვინმეს აქვს გადაცდომა ჩადენილი ამ კონკრეტულ ეპიზოდში, ყველა ადეკვატურად დაისაჯოს“.

„პირველ რიგში მინდა აღვნიშნო, რომ ქვეყანაში ნარკოპოლიტიკა რადიკალურად არის შესაცვლელი და მოხარული ვარ რომ პრემიერ მინისტრმა ამ რეფორმის დაჩქარება სთხოვა პარლამენტს. რაც შეეხება თვითონ, კონკრეტულ მომხდარ ფაქტს, თითოეული ჩვენგანისთვის მიუღებელია, არ აქვს მნიშვნელობა ეს იქნება მთავრობის წევრი თუ ნებისმიერი მოქალაქე, როცა ძალოვანი სტრუქტურის თანამშრომლის მხრიდან თუნდაც ეჭვის დონეზე უშვებ ნარკოტიკის ჩადების შესაძლებლობას, ეს ყველაფერი წარსულში უნდა დარჩეს და დარწმუნებული ვარ რომ წარსულში დარჩება, როცა მოხდება ნარკოპოლიტიკის ლიბერალიზაცია და პოლიციის რეფორმის ბოლომდე მიყვანა, რომელიც დაწყებულია. ჩვენ, საზოგადოება, სამართალდამცველებისგან პირველ რიგში ველით დახმარებას და სიმართლის დაცვას. ჩვენ ვენდობით მათ, ამიტომ არც ერთი კონკრეტული შემთხვევა არ რჩება ჩვენი ხელისუფლების, უწყების ხელმძღვანელობის ყურადღების მიღმა. სრულიად დაუშვებელია, რომ რომელიმე მათგანის რაიმე სახის გადაცდომამ ჩირქი მოსცხოს ჩვენს პოლიციელებს - ადამიანებს, რომლებიც თავიანთი სიცოცხლის ფასად დგანან ქვეყნის სადარაჯოზე. ამ ეტაპზე მინდა გითხრათ, რომ მიდის შიდა მოკვლევა, სტრუქტურის ხელმძღვანელობა გააკეთებს ყველაფერს, რომ თუკი ვინმე არის დამნაშავე ან თუ ვინმეს აქვს გადაცდომა ჩადენილი ამ კონკრეტულ ეპიზოდში, ყველა ადეკვატურად დაისაჯოს“, განაცხადა კახა კალაძემ ვიდეო მიმართვაში, რომელიც თავად, ოპერატორის გარეშე ჩაწერა და გაავრცელა.