მას შემდეგ რაც ვირჯინიაში, ბეისბოლის მოედანზე ვარჯიშის მიმდინარეობისას ამერიკელ „რესპუბლიკელ“ კონგრესმენს და მის თანაშემწეს ცეცხლსასროლი იარაღიდან ესროლეს, ინციდნეტის რამდენიმე დეტალი ხდება ცნობილი.

ალაბამას შტატის კანონმდებელმა მო ბრუკსმა CNN-ს უთხრა, რომ ცეცხლსასროლი იარაღიდან აშშ-ს წარმომადგენლობითი პალატის წევრს, უმრავლესობის წარმომადგენელ „რესპუბლიკელს“, სტივ სქელიზს და მის მრჩეველს ესროლეს.

არიზონას სენატორის ჯეფ ფლეიკის ინფორმაციით, ერთ-ერთი ტყვია კონგრესმენს ფეხში აქვს მოხვედრილი. იგი დაახლოებით 10 წუთის განმავლობაში იწვა, სანამ სხვა პოლიტიკოსები მიაღწევდნენ მასთან და გაუწევდნენ სამედიცინო დახმარებას.

ამ დროისთვის ცნობილი დეტალები:

შეიარაღებულმა მამაკაცმა ცეცხლი ვირჯინიაში, ალექსანდრიაში, ბეისბოლში ვარჯიშის დროს გახსნა;

დაჭრილია 5 ადამიანი, მათ შორის კონგრესმენი სტივ სქელიზი და კონგრესის პოლიციის ორი ოფიცერი;

თავდამსხმელი პატიმრობაშია აყვანილი და იგი უკვე საფრთხეს არ წარმოადგენს;

თავდამსხმელი თეთრკანიანი იყო და დაახლოებით 40-ჯერ გაისროლა.

პოლიციამ პასუხი თავდასხმიდან 3 წუთში გასცა და ეჭვმიტანილი, რომელსაც ტყვია ჰქონდა მოხვედრილი, ცოცხლად აიყვანა, თუმცა მოგვიანებით იგი გარდაიცვალა. 

პრეზიდენტმა ტრამპმა „თვითერზე“ დაწერა, რომ სქელიზის „დაზიანებები მძიმეა, მაგრამ იგი სრულად გამოჯანმრთელდება“.

აშშ-ის კანონმდებლებს, „რესპუბლიკლებს“ და „დემოკრატებს“ შორის ხუთშაბათისთვის დაგეგმილი ყოველწლიური თამაშის მოსამზადებელი ვარჯიში იმართებოდა ვირჯინიაში, ბეისბოლის მოედანზე, სადაც სროლებს ჰქონდა ადგილი.