ჰელმუტ კოლი, გერმანიის ყოფილი კანცლერი და 1990 წელს ქვეყნის ხელახალი გაერთიანების არქიტექტორი, 87 წლის ასაკში გარდაიცვალა.

კოლი გერმანიას 16 წლის განმავლობაში, 1982 წლიდან 1998 წლამდე ხელმძღვანელობდა. იგი ბერლინის კედლის დაცემის შემდეგ გაერთიანებულ აღმოსავლეთ და დასვლეთ გერმანიას ედგა სათავეში.

მის ფრანგ მოკავშირესთან, საფრანგეთის პრეზიდენტ ფრანსუა მიტერანთან ერთად იგი ევროს შემოღების სათავეში იდგა.

BBC-ის ცნობით, ევროკომისიის ხელმძღვანელმა, ჟან კლოდ იუნკერმა ევროკავშირის ინსტიტუტებზე დროშების ჩამოშვების ბრძანება გასცა.

„ჰელმუტის სიკვდილი ჩემთვის დიდი ტკივილის მომნიჭებელია“, განაცხადა იუნკერმა „თვითერზე“. „ჩემი მასწავლებელი, ჩემი მეგობარი, ევროპის ძალიან დიდი დედაარსი, ის დიდად, დიდად მოგვენატრება“.

შეერთებული შტატების ყოფილმა პრეზიდენტმა ჯორჯ ეიჩ დაბლიუ ბუშმა სამძიმარი გამოხატა კოლის გარდაცვალების გამო, რომელთანაც 1989-1993 წლებში, მისი პრეზიდენტობისას, მჭიდრო შემხებლობა ჰქონდა და განაცხადა, რომ ის იყო „თავისუფლების ნამდვილი მეგობარი“ და „ომის შემდგომი ევროპის ერთ-ერთი ყველაზე დიდი ლიდერი“.

გერმანიის საგარეო საქმეთა მინისტრმა ზიგმარ გაბრიელმა პატივი მიაგო „დიდ გერმანელ სახელმწიფო მოღვაწეს და ყველა დიდ ევროპელზე მაღლა მდგომ პიროვნებას“, იუწყება BBC.

2008 წლის შემდეგ, კოლი, მძიმედ წაქცევის გამო, ეტლზე იყო მიჯაჭვული. იგი მის სახლში, ლუდვიგსჰაფენში გარდაიცვალა.

იგი მე-20 საუკუნის გერმანიის ყველაზე ხანრგძლივად მოღვაწე კანცლერი იყო.

მან, როგორც ევროპული ინტეგრაციის მგზნებარე მხარდამჭერმა, დაარწმუნა გერმანელები დაეთმოთ თავიანთი საყვარელი ფულის ერთეული, გერმანული მარკა ევროპული საერთო ვალუტის, ევროს სასარგებლოდ.

მაგრამ გერმანელებისთვის ის ყველა სხვა დანარჩენზე მაღლა დგას იმის გამო, რომ მან გააერთიანა მე-2 მსოფლიო ომის შემდეგ მოკავშირეთა მიერ დაყოფილი ქვეყანა, დაჰპირდა რა ყოფილი კომუნისტური აღმოსავლეთის მცხოვრებთ უფრო მდიდარ დასავლეთთან ინტეგრაციას და აყვავებულ ცხოვრებას.