იტალიის მთავრობის ოფიციალური პირები ათი ათასობით მიგრანტისთვის ევროკავშირის ვიზების გაცემით დაიმუქრნენ, რითაც მთავრობა მიგრანტების და ლტოლვილების მზარდი კრიზისის მოგვარებას შეეცდება, რადგან ვიზების გაცემით, ახალ შემომსვლელებს ჩრდილოეთში გამგზავრების საშუალებას მისცემენ. „თაიმსის“ ცნობით, საუბარია 200,000 მიგრანტზე, რომელიც იტალიაში შევიდა და ევროპის გარშემო მოგზაურობას აპირებს.

როგორც ბრიტანული „დეილი მეილი“ წერს, იტალიამ უწინ მოუწოდა თავის ევროკავშირის მეზობლებს დახმარებოდნენ მზარდი ჰუმანიტარული კრიზისის გადაჭრაში, მაგრამ ის იმედგაწბილებული დარჩა მეზობლების უმოქმედობით.

თავისი გეოგრაფიული მდებარეობის გამო იტალია ერთ-ერთი პირველი პუნქტია, რომელსაც სამხრეთიდან გამოქცეული ადამიანები ევროპაში შესასვლელად იყენებენ.

მხოლოდ მიმდინარე წელს, უკვე 86,000 მიგრანტი შევიდა ხმელთაშუა ზღვიდან იტალიაში და ქვეყანა ვერ უმკლავებდა ჩრდილოეთ აფრიკიდან შემომავალ მიგრანტების მზარდ ნაკადებს.

ამჟამად ასეულობით თავშესაფრის მაძიებელია თავმოყრილი მთელი იტალიის გასწვრივ პატარა სოფლების გადაჭედილ ცენტრებში, რომელთაც ადგილობრივებმა მეტსახელად „ადამიანთა საწყობები“ შეარქვეს.

ევროპული საბჭოს მთავარმა ანალიტიკოსმა საგარეო ურთიერთობების საკითხებში მატილა ტოალდომ „თაიმსს“ უთხრა: „თუკი მიგრანტები შემოსვლას განაგრძობენ და იტალია გადაწყვეტს, რომ მათ მისცეს საბუთები იტალიის დასატოვებლად და საზღვრის გადასაკვეთად, ეს უკიდურესი არჩევანი იქნება. იტალიელებმა ევროკავშირიდან დახმარების მიღების ყველანაირი იმედი დაკარგეს და მათ შესაძლოა თქვან: ‘თუ თქვენ არ გახდით ამას საერთო გამოწვევად, მაშინ ჩვენ გავხდით“.

იტალიის საგარეო საქმეთა მინისტრის მოადგილემ მარიო გირომ და მმართველი „დემოკრატიული პარტიის“ სენატორმა ლუიჯი მანჩონიმ „თაიმსს“ უთხრეს, რომ მიგრანტებზე დროებითი ვიზების გაცემის საკითხი განხილვების ქვეშაა.

გირო დარმწუნებულია, რომ იტალიას შეუძლია გამოიყენოს „ევროპული საბჭოს დირექტივა 2001/55“, რომელიც ბალკანეთის კონფლიქტის შემდეგ განვითარდა, რაც დიდი რაოდენობით იძულებით გადაადგილებულ პირთათვის ევროპაში დროებითი შესვლის უფლების მიცემის საშუალებას იძლევა. და თუ იტალია ნამდვილად ამგვარი ქმედებისკენ აიღებს კურსს, შენგენის სქემის მხარდაჭერა, რაც ევროკავშირის ყველა მოქალაქეს კონტინენტის გარშემო თავისუფლად გადაადგილების უფლებას რთავს, შესაძლოა საფრთხის ქვეშ აღმოჩნდეს.

ამან შესაძლოა სერიოზულად დაძაბოს ურთიერთობები მეზობელ საფრანგეთთან და ავსტრიასთან, რომელთაც ადრე იმ მიგრანტების უკან გასაბრუნებლად, რომლებიც ამ მარშრუტით ცდილობდნენ შესვლას, ძაღლები და დაჯავშნული სატრანსპორტო საშუალებები გამოიყენეს.