ამერიკის შეერთებული შტატების პრეზიდენტის, დონალდ ტრამპის მთავარმა სტრატეგმა, სტივ ბანონმა თანამდებობის დატოვების შემდეგ განაცხადა, რომ უბრუნდება თავის უწინდელ საქმიანობას მის მიერ დაფუძნებულ Breitbart-ში, ულტრა-კონსერვატიულ მედიასაშუალებაში და ყველა ფლანგზე იწყებს „ომს, ტრამპის ოპონენტების წინააღმდეგ“.

„მე ვტოვებ თეთრ სახლს და მივდივარ ტრამპის ოპონენტების წინააღმდეგ ომში - Capitol Hill-ზე (კონგრესში), მედიაში და მთელ ამერიკაში“, განაცხადა ბანონმა, რომელმაც დასძინა, რომ კვლავ „ხელთ უპყრია მისი იარაღი Breitbart-ის სახით“, რომლის მკითხველთა რაოდენობამ და სარეკლამო შემოსავლებმა მნიშვნელოვნად იკლო ტრამპის პრეზიდენტად არჩევის შემდეგ, როგორც ამას ბრიტანული „გარდიანი“ წერს.

ბანონის მიერ თანამდებობიდან წასვლის შესახებ განცხადება თეთრი სახლის პრესმდივანმა სარა სანდერსმა პარასკევს გაავრცელა, რომელშიც აღნიშნულია, რომ ეს არის ბანონის და თეთრი სახლის ადმინისტრაციის ხელმძღვანელის, ჯონ კელის მიერ მიღებული ორმხრივი გადაწყვეტილება.

„თეთრი სახლის ადმინისტრაციის ხელმძღვანელი ჯონ კელი და სტივ ბანონი შეთანხმდნენ, რომ დღეს სტივის ბოლო დღე იქნება მის თანამდებობაზე. ჩვენ მადლიერებას გამოვხატავთ მის მიერ გაწეული სამსახურისთვის და მას ყველაფერს საუკეთესოს ვუსურვებთ“, განაცხადა სანდერსმა.

63 წლის ბანონი, მემარჯვენე ფრთის ნაციონალისტი და Breitbart.com-ის ყოფილი და აწ უკვე ისევ თავკაცი, ტრამპის საარჩევნო კამპანიის მთავარი არქიტექტორი იყო და მას უზარმაზარი წვლილი მიუძღვის 2016 წლის არჩევნებში „რესპუბლიკელი“ პრეზიდენტობის კანდიდატის გამარჯვებაში. მისი დახმარებით შეიქმნა ტრამპის საარჩევნო გზავნილი -„ამერიკა - უპირველეს ყოვლისა“, მაგრამ მას თეთრ სახლში გავლენის მოსაპოვებლად მის მოწინააღმდეგე მრჩევლებთან და ტრამპის ოჯახთან უწევდა ბრძოლა.

ის უკანასკნელი მაღალი ცნობადობის და გავლენის მქონე ფიგურაა, რომელიც თეთრი სახლის გუნდს ჩამოაშორეს მას შემდეგ, რაც ეროვნული უსაფრთხოების მრჩეველმა, მაიკლ ფლინმა, პრესმდივანმა შონ სპაისერმა, ადმინისტრაციის ხელმძღვანელმა რენს პრიბუსმა და კომუნიკაციების დირექტორმა ანტონი სკარამუჩიმ თანამდებობები დატოვეს.