საუდის არაბეთის ტახტის მემკვიდრე პრინცმა, მუჰამედ ბინ სალმანმა ირანს იემენისთვის რაკეტების მიწოდებასა და „პირდაპირი სამხედრო აგრესიის“ განხორციელებაში დასდო ბრალი.

„ეს შესაძლოა, მიჩნეული იყოს ომის აქტად“, განაცხადა პრინცმა დიდი ბრიტანეთის საგარეო მდივანთან, ბორის ჯონსონთან სატელეფონო საუბრისას, როგორც ამას BBC საუდის არაბეთის სახელმწიფო მედიაზე დაყრდნობით იტყობინება.

ირანმა უარყო, რომ იარაღს აწვდის „ჰუტების“ მოძრაობას, რომელიც იემენის მთავრობის მხარდაჭერით საუდის არაბეთის მხარდაჭერილ კოალიციას ებრძვის.

ირანის საგარეო საქმეთა მინისტრმა, მუჰამედ ჯავად ზარიფმა ორშაბათს განაცხადა, რომ საუდის არაბეთის „აგრესიული ომები“ და „რეგიონული მუქარა“ საფრთხეს უქმნის ახლო აღმოსავლეთს.

„ჰუტებთან“ ალიანსში მყოფი მედიის ინფორმაციით, მეამბოხეებმა შაბათ საღამოს ბალისტიკური რაკეტა მეფე ხალიდის სახელობის საერთაშორისო აეროპორტისკენ გაუშვეს, რომელიც დაახლოებით 850 კილომეტრითაა დაცილებული იემენის საზღვრიდან და 35კმ-ით ერ-რიადიდან.

საუდის არაბეთის მედიის ცნობით, სარაკეტო თავდაცვითმა სისტემებმა რაკეტა ფრენის დროს შეაკავა, მაგრამ რაკეტის ზოგიერთი ფრაგმენტი აეროპორტის ტერიტორიის შიგნით ჩამოვარდა. მსხვერპლის შესახებ ცნობები არ გავრცელებულა.

„ჰუმან რაითს ვოჩმა“ განაცხადა, რომ გაურკვეველი რაკეტის სამოქალაქო აეროპორტის მიმართულებით გაშვება აშკარა სამხედრო დანაშაულია.

საუდის არაბეთის პრესის ოფიციალურმა სააგენტომ სამშაბათს გაავრცელა ინფორმაცია, რომლის თანახმადაც, პრინ მუჰამედთან სატელეფონო საუბრისას ბორის ჯონსონმა „დაგმო ჰუტების ხუნტის მილიციის მიერ ბალისტიკური რაკეტის გაშვება“ და დაადასტურა „ბრიტანეთის საუდის არაბეთის გვერდით დგომა, წინ აღუდგეს უსაფრთხოების მუქარებს“.

„თავის მხრივ, ტახტის მემკვიდრე პრინცმა ხაზი გაუსვა, რომ ირანული რეჟიმის ჩართულობა - ჰუტუს მილიციისთვის რაკეტებით მომარაგებით - მიიჩნევა ირანის რეჟიმის პირდაპირ სამხედრო აგრესიად და შესაძლოა, მიჩნეული იყოს სამეფოს წინააღმდეგ ომის ქმედებად“, ნათქვამია საუდის არაბეთის სახელმწიფო მედიის მიერ გავრცელებულ ინფორმაციაში.

საუდის არაბეთის საგარეო საქმეთა მინისტრმა, ადელ ალ-ჯუბეირმა ორშაბათს CNN-ს უთხრა, რომ ამაში ასევე ირანის მხარდაჭერილი ლიბანის „ჰეზბოლას“ მოძრაობაც იყო ჩართული.

„ეს იყო ირანული რაკეტა, რომელიც ჰეზბოლამ იემენის იმ ტერიტორიიდან გაუშვა, რომელიც ჰუტებს აქვთ ოკუპირებული“, თქვა მან და დაამატა, რომ რაკეტა იმის მსგავსი იყო, რომელიც ივლისში იქნა გაშვებული და საუდის არაბეთის ქალაქ მექას სიახლოვეს იქნა ჩამოგდებული, და რომ ის ირანშია დამზადებული, შემდეგ დაშლილი სახით კონტრაბანდული გზით იემენშია შეტანილი, შემდეგ კი „ირანის რევოლუციის მცველთა და ჰეზბოლას ოპერატიული სამსახურების“ მიერ არის აწყობილი.

ჯუბიერმა გამაფრთხილებლად განაცხადა, რომ „ირანის ინტერვენციები რეგიონში, ზიანის მიმყენებელია მეზობელი ქვეყნების უსაფრთხოებისთვის და უარყოფით გავლენას ახდენს საერთაშორისო მშვიდობასა და უსაფრთხოებაზე“.

ირანელმა კოლეგამ უარყო ბრალდებები.

„საუდის არაბეთის სამეფო ბომბავს და მიწასთან ასწორებს იემენს, კლავს ათასობით უდანაშაულო ადამიანს, მათ შორის ბავშვებს, ავრცელებს ქოლერას და შიმშილს, მაგრამ რა თქმა უნდა, ბრალს სდებს ირანს“, დაწერა „თვითერზე“ ზარიფმა.

უფრო ადრე, ირანის საგარეო საქმეთა სამინისტროს წარმომადგენელმა განაცხადა, რომ რაკეტის გაშვება „დამოუკიდებელი ქმედება“ იყო, რაც საუდის არაბეთის ხელმძღვანელობით მოქმედი კოალიციის „აგრესიის“ საპასუხო გახლდათ და ირანს ამასთან საერთო არაფერი აქვს.

გაერო-ს თანახმად, 8 670 ადამიანზე მეტი - მათგან 60% მშვიდობიანი მოქალაქე - იქნა მოკლული და 49 960-მა დაზიანებები მიიღო საჰაერო დარტყმებისას და სახმელეთო ბრძოლებისას მას შემდეგ, რაც 2015 წლის მარტში კოალიცია იემენის სამოქალაქო ომში ჩაერია.