ზიმბაბვეს პრეზიდენტი რობერტ მუგაბე გადადგა, განაცხადა პარლამენტის სპიკერმა ჯაკობ მუდენდამ. ინფორმაციას BBC ავრცელებს.

მუგაბეს წერილში ნათქვამია, რომ პოსტის დატოვების გადაწყვეტილება ნებაყოფილობითი იყო და მან ეს ნაბიჯი იმის გამო გადადგა, რომ ძალაუფლების მშვიდობიანი გადაცემა მომხდარიყო, იტყობინება სააგენტო „როიტერსი“.  

აღნიშნული ცნობის გავრცელებამდე ზიმბაბვეს პარლამენტმა პრეზიდენტ რობერტ მუგაბეს წინააღმდეგ საიმპიჩმენტო პროცედურა დაიწყო.

მუგაბეს, რომელიც ქვეყნის სათავეში 1980 წლიდან იმყოფება, ბრალად ედება მისი ცოლისთვის „საკონსტიტუციო ძალაუფლების უზურპაციის“ ნების დართვა იმით, რომ შეეცადა იგი მისი შემცვლელის პოზიციაზე დაენიშნა.

გასულ კვირას სამხედროების მიერ ძალაუფლების ხელში აღების შემდეგ, რობერტ მუგაბე ბოლო წუთებამდე მტკიცე უარს აცხადებდა პრეზიდენტის პოსტიდან გადადგომაზე.

მუგაბეს მიერ თანამდებობიდან წასვლის გადაწყვეტილების მიღებამდე ზიმბაბვეს ყოფილმა ვიცე-პრეზიდენტმა, რომლის პოსტიდან დათხოვნა გახდა მიზეზი არმიის ამბოხებისა და ქვეყნის მათ მიერ კონტროლის ქვეშ მოქცევისა, დაჟინებით მოუწოდა პრეზიდენტ რობერტ მუგაბეს, გადამდგარიყო.

მნანგაგვამ განაცხადა, რომ 93 წლის პრეზიდენტმა ყური უნდა დაუგდოს მისი ხალხის ხმას და უნდა დატოვოს თანამდებობა.

ემერსონ მნანგაგვას თქმით, მან ორი კვირის წინ იმ მიზეზით დატოვა ქვეყანა, რომ მის სიცოცხლეს საფრთხე დაემუქრა. მან დაამატა, რომ ის იქამდე არ დაბრუნდება, სანამ საკუთარი თავის უსაფრთხოებაში არ დარწმუნდება.