საქართველოს ყოფილი პრეზიდენტი მიხეილ სააკაშვილი საქართველოში მის წინააღმდეგ გამოტანილ განაჩენს ეხმაურება. სააკაშვილმა განცხადება სოციალურ ქსელში გაავრცელა და აღნიშნა, რომ სასამრთლოს გადაწყვეტილება უკანონოა და განაჩენი საერთაშორისო ნორმებთან წინააღმდეგობაში მოდის.

„ქართული სასამართლოს განაჩენი, რომელიც გაზპრომის უმსხვილესი აქციონერის, ივანიშვილის სრული კონტროლის ქვეშ არის, ჩემთან მიმართებით სრულიად უკანონოა და ეწინააღმდეგება ყველა საერთაშორისო ეროვნულ ნორმასა და ჯანსაღ აზრს. პრეზიდენტის გასამართლება იმის გამო, რომ მან შეწყალების უფლება გამოიყენა, ამ პროცესის პოლიტიზებულობაზე მიანიშნებს. ეს ნიშნავს იმას, რომ საქართველოს ხელისუფლებამ ამ ხუთი წლის განმავლობაში ჩემს წინააღმდეგ ვერანაირი კომპრომატი ვერ მოიპოვა, ვერც კორუფციისა და ვერც სხვა სახის სამართალდარღვევის. ეს განაჩენი ისევე, როგორც კიევში მიმდინარე პარალელური პროცესი, მეტყველებს იმაზე, რომ საქართველოსა და უკრაინის ხელისუფლებაში მოსული ოლიგარქები სინქრონულად და კოორდინირებულად მოქმედებენ ჩემს წინააღმდეგ, როგორც კორუფციასთან, ოლიგარქატთან და ხალხის ძარცვასთან ბრძოლის ლიდერთან.", წერს სააკაშვილი „ფეისბუქის" საკუთარ გვერდზე.