კუბამ ორდღიანი ეროვნული გლოვა გამოაცხადა მას შემდეგ, რაც 1980-იანი წლების მერე კუნძულზე, პარასკევს, შუადღისას, ყველაზე საშინელი ავიაკატასტროფა მოხდა. 

კუბის სახელმწიფო ავიახაზების კუთვნილი თვითმფრინავი „ბოინგ 737“ ჰავანას საერთაშორისო აეროპორტის სიახლოვეს, აფრენიდან მალევე ჩამოვარდა და აფეთქდა.

სოციალურ მედიაში კუბის ელჩმა შეერთებულ შტატებში, ხოსე რამონ კაბანასმა დაწერა, რომ თვითმფრინავის ბორტზე 104 მგზავრი იმყოფებოდა. ადგილობრივი მედიის ცნობით კი ბორტზე 110 მგზავრი და ეკიპაჟის 9 წევრი იმყოფებოდა.

კუბის სახელმწიფო მედიის ცნობით, დაღუპულია 100-ზე მეტი ადამიანი. კუბის „კომუნისტური პარტიის“ გაზეთის, „გრანმას“ ცნობით, მხოლოდ სამი ადამიანია გადარჩენილი, ისინი საავადმყოფოში არიან გადაყვანილი, თუმცა მათი მდგომარეობა კრიტიკულია.

(ვიდეოს სანახავად გადადით youtube-ის ბმულზე).

მანამდე თვითმხილველებმა ადგილობრივ მედიას უთხრეს, რომ მათ სასწრაფო დახმარების ავტომანქანები იხილეს, რომელთაც სავარაუდოდ, ავიალაინერის ნამსხვრევებიდან ამოყვანილი გადარჩენილი მგზავრები გადაჰყავდათ საავადმყოფოში.

ეროვნული ავიახაზების, „Cubana de Aviacon“-ის ბოინგი შიდა რეისს ასრულებდა და ჰავანადან კუნძულის აღმოსავლეთით მდებარე ქალაქ ჰოლგუინში მიფრინავდა. თვითმფრინავის ფრენის პერიოდად 1 საათი და 20 წუთი იყო განსაზღვრული.  

ადგილობრივი მედიის ცნობით, თვითმფრინავი ფერმაში ჩამოვარდა და ის ძლიერ დაზიანებული და დამწვარია. ადგილზე სახანძრო-სამაშველო და სასწრაფო დახმარების ჯგუფების დიდი რაოდენობა იყო მობილიზებული. ავიალაინერის კატასტროფის მიზეზი ჯერჯერობით არ დასახელებულა. 

შემთხვევის ადგილას კუბის მთავრობის ოფიციალური პირები მივიდნენ, მათ შორის პრეზიდენტი მიგელ დიას კანელი.

ჰავანას საერთაშორისო აეროპორტი, რომელიც კუბის დედაქალაქიდან სამხრეთ-დასავლეთ ნაწილში 9 მილის დაშორებით მდებარეობს, ყოველწლიურად თითქმის 6 მილიონ მგზავრს იღებს.