ჯერ კიდევ უცნობია თუ რა შეთანხმებას მიაღწიეს დონალდ ტრამპმა და კიმ ჩენ ინმა ისტორიული შეხვედრისას, მაგრამ ტრამპის მიერ პრესისთვის გაკეთებული მოკლე კომენტარის მიხედვით ირკვევა, რომ მოლაპარაკებები შესანიშნავად წარიმართა და ყოველგვარ მოლოდინს გადააჭარბა.
„მოლაპარაკებები წარიმართა იმაზე უკეთესად, ვიდრე ამას ვინმე წარმოიდგენდა“, განაცხადა დონალდ ტრამპმა.
როგორც BBC იუწყება, აღნიშნულ ფოტოზე (მაღლა) ტრამპი და კიმი პარკში, იმ სასტუმროს ბაღში გადაადგილდებიან, სადაც მათი მოლაპარაკებები გაიმართა, სანამ ისინი „ხელმოწერის ცერემონიის ადგილისკენ“ აიღებენ გეზს.
სინგაპურის კუნძულ სანტოსაზე ამერიკის შეერთებული შტატების პრეზიდენტს, დონალდ ტრამპსა და კორეის სახალხო-დემოკრატიული რესპუპლიკის უზენაეს ლიდერს, კიმ ჩენ ინს შორის ისტორიული შეხვედრა შედგა და ეს იყო პირველი შემთხვევა, როცა აშშ-ის მოქმედი პრეზიდენტი ჩრდილოეთ კორეის ლიდერს შეხვდა.
თავდაპირველად ლიდერებს შორის შეხვედრა ერთი-ერთზე შედგა, რის შემდეგაც ისინი თავიანთი დელეგაციების წევრებთან ერთად მიუსხდნენ მოლაპარაკებების მაგიდას.
ტრამპის გარდა მოლაპარაკებების მაგიდას ამერიკის მხრიდან სახელმწიფო მდივანი მაიკ პომპეო, ადმინისტრაციის ხელმძღვანელი ჯონ კელი და მრჩეველი ეროვნული უსაფრთხოების საკითხებში ჯონ ბოლტონი უსხდნენ.
კიმ ჩენ ინთან კი მოლაპარაკებების მაგიდასთან იჯდნენ:
კიმ იონ ჩოლი: კიმ ჩენ ინის „მარჯვენა ხელი“ - გენერალი და სადაზვერვო სამსახურის ყოფილი ხელმძღვანელი, რომელიც ივნისის დასაწყისში ვაშინგტონში ჩავიდა და ჩრდილოეთ კორეის ყველაზე მაღალი რანგის პირი გახდა, რომელიც ოდესმე სტუმრობდა შეერთებულ შტატებს;
რი იონ ჰო: ჩრდილოეთ კორეის საგარეო საქმეთა მინისტრი, რომელიც 1990-ინა წლებში მოლპარაკებებს აშშ-სთან აწარმოებდა;
რი სუ იონი: მას საგარეო საქმეთა მინისტრის პოსტი ეკავა, ვიდრე რი იონ ჰო შეცვლიდა. მიუხედავად ამისა, იგი ფხენიანში ერთ-ერთ ყველაზე მაღალი რანგის ოფიციალურ პირად ითვლება.
შეხვედრის ძირითადი მიზანი ჩრდილოეთ კორეის ბირთვული განიარაღების მიღწევაა, რაც სავარაუდოდ, ადვილი არ იქნება, თუმცა იმედოვნებენ, რომ მოლაპარაკებების პირველი რაუნდი პროგრესით დასრულდება.
„სასიამოვნოა თქვენი გაცნობა, ბატონო პრეზიდენტო“, უთხრა ტრამპს კიმმა ინგლისურად.
შეკითხვაზე, თუ როგორ მიდიოდა მისი შეხვედრა კიმთან, ტრამპმა უპასუხა: „ძალიან, ძალიან კარგად. ჩინებული ურთიერთობა“.
როგორც BBC წერს, ჩრდილოეთ კორეის ლიდერების შესახებ ფაქტები კარგად ცნობილი არ არის, მაგრამ არსებობს იმის ნიშნები, რომ კიმი ინგლისურს შესანიშნავად ფლობს. 2013 წელს ჩრდილოეთ კორეაში დენის როდმანის ვიზიტისას, მედია წერდა, რომ ის და კალათბურთის მსოფლიო ვარსკვლავი ერთმანეთს პირდაპირ, თარჯიმნის გარეშე ესაუბრებოდნენ. კიმი როდმანთან ერთად შვეიცარიის სკოლა-ინტერნატში სწავლობდა.
აღსანიშნავია, რომ დონალდ ტრამპს 14 ივნისს დაბადების დღე აქვს. მიუხედავად იმისა, რომ ეს თარიღი ჯერ არ დამდგარა, მას სინგაპურში უკვე წინასწარ მიულოცეს დაბადების დღე.
აშშ-ის 45-ე პრეზიდენტი 72 წლის ხდება.
მოგესალმებათ საინფორმაციო სააგენტო GUARDIANGE-ის ადმინისტრაცია და გაცნობებთ, რომ სააგენტოს განახლების შედეგად, ამიერიდან ვებგვერდის ძველ ვერსიაზე -WWW.GUARDIANGE.GE ხელმისაწვდომი იქნება 2023 წლის 7 სექტემბრამდე განთავსებული საინფორმაციო ხასიათის წერილობითი/ფოტო/ვიდეო მასალა, ხოლო განახლებული სააგენტოს ვებგვერდს შეგიძლიათ გაეცნოთ WWW.GUARDIANGE.COM-ზე.
GUARDIAN.GE - ჩრდილოეთ კორეის ლიდერი კიმ ჩენ ინი სექტემბერში რუსეთში პრეზიდენტ ვლადიმერ პუტინთან შესახვედრად გამგზავრებას აპირებს, იტყობინება BBC-ის პარტნიორი CBS-ი ამერიკელ ოფიციალურ პირზე დაყრდნობით. ორი ლიდერი განიხილავს შესაძლებლობას, რომ ჩრდილოეთ კორეამ მოსკოვს იარაღი მიაწოდოს უკრაინაში ომის მხარდასაჭერად, განაცხადა ოფიციალურმა წარმომადგენელმა. დაგეგმილი შეხვედრის ზუსტი ადგილი უცნობია. წყაროებმა „The New York Times“-ს განუცხადეს, რომ კიმი, სავარაუდოდ, ბრონირებული მატარებლით გაემგზავრება.