თურქეთის პრეზიდენტი რეჯეფ თაიფ ერდოღანი საპრეზიდენტო არჩევნებში წინაა, როგორც ამას BBC სახელმწიფო მედიაზე დაყრდნობით იტყობინება მას შემდეგ, რაც ხმების მეხუთედი დათვლილია.

ერდოღანს ამომრჩეველთა 59% და მის მთავარ მეტოქეს, მუჰარემ ინჯეს 27% აქვს მიღებული.

თუკი ერდოღანი 50%-ზე მეტს მიიღებს, იგი გამარჯვებულად გამოცხადდება და მეორე ტურის გამართვის საჭიროება დღის წესრიგიდან იქნება მოხსნილი.

პრეზიდენტის გარდა თურქეთი ახალ პარლამენტსაც ირჩევს და ქვეყნის სახელმწიფო მედიის ცნობითვე, ამ დროის მონაცემებით, პრეზიდენტთან ერთად მისი პოლიტიკური ძალა „სამართლიანობის და განვითარების პარტია“ ლიდერობს.

საპარლამენტო არჩევნების ხმების 27% დათვლილია და პრეზიდენტის პარტია 48%-ით ლიდერობს, იტყობინება ახალი ამბების სახელმწიფო სააგენტო „ანადოლუ“. მთავარ ოპოზიციურ ძალას, CHP-ს კი 18% აქვს მიღებული.

საარჩევნო უბნებზე ამომრჩეველთა 87% გამოცხადდა, როგორც ამას სახელმწიფო ტელევიზია იუწყება.

თურქეთში საპრეზიდენტო და საპარლამენტო არჩევნები რამდენიმე საათის წინ დასრულდა. ყველა საარჩევნო უბანი ადგილობრივი დროით 17:00 საათზე დაიხურა და ხმების დათვლის პროცესი ჯერაც მიმდინარეობს. სრული პირველადი შედეგები სავარაუდოდ კვირას, გვიან გახდება ცნობილი.

საკუთარი არჩევანის დაფიქსირების შემდეგ მოქმედმა პრეზიდენტმა, რეჯეფ თაიფ ერდოღანმა განაცხადა, რომ ამომრჩეველთა მაღალ აქტივობას ჰქონდა ადგილი. იგი იმედოვნებს, რომ ხმების 50%-ზე მეტს მიიღებს, რითაც თავიდან აიცილებს მეორე ტურს.

„ამ არჩევნებით თურქეთი დემოკრატიული რევოლუციის გზით მიდის“, განაცხადა ერდოღანმა სტამბოლში ხმის მიცემის შემდეგ ჟურნალისტებთან კომენტირებისას.

თურქეთში მიმდინარე საპრეზიდენტო და საპარლამენტო არჩევნებში ამომრჩეველმა უკვე გადაწყვიტა, მისცემს თუ არა კვლავ მანდატს ქვეყნის ამჟამინდელ ლიდერს, რეჯეფ თაიფ ერდოღანს, რომელიც პრემიერ მინისტრის პოსტზე ხანგრძლივად მოღვაწეობის შემდეგ, პრეზიდენტის თანამდებობაზე მეორე ვადით იყრიდა კენჭს, თუმცა პირველი შედეგები სრულად ჯერ ცნობილი არ არის და ის მოგვიანებით გამოქვეყნდება.

თუკი მმართველი „სამართლიანობის და განვითარების პარტიის“ ლიდერი რიგგარეშე საპრეზიდენტო არჩევნებში მეორე ვადითაც იქნა არჩეული, კრიტიკოსები შიშობენ, რომ ქვეყანაში, სადაც 2016 წლის ივლისის სახელმწიფო გადატრიალების მცდელობის შემდეგ ჯერ კიდევ საგანგებო მდგომარეობაა დაწესებული და სადაც 2017 წლის რეფერენდუმზე პრეზიდენტის ძალაუფლების განმტკიცებას დაუჭირეს მხარი, დემოკრატიული მმართველობა კიდევ უფრო შესუსტდება.

ერდოღანის მთავარი მეტოქე „რესპუბლიკური სახალხო პარტიის“ კანდიდატი მუჰარემ ინჯე გახლავთ.

თურქეთში საპრეზიდენტო არჩევნები წესით, 2019 წლის ნოემბერში უნდა გამართულიყო, მაგრამ ერდოღანმა რიგგარეშე არჩევნების ჩატარების გადაწყვეტილება მიიღო.

ერდოღანმა და მისმა მთავარმა მეტოქემ მუჰარემ ინჯემ შაბათს, საარჩევნო კამპანიის ბოლო დღეს, უზარმაზარი დემონსტრაციები მოაწყვეს და ორთავემ ერთმანეთს თურქეთის მმართველობისთვის შეუფერებელი უწოდა.

„თუკი ერდოღანმა გაიმარჯვა, თქვენი ტელეფონების მოსმენა გაგრძელდება... გაგრძელდება შიშის ქვეშ ცხოვრება... თუკი ინჯე გაიმარჯვებს, სასამართლოები დამოუკიდებელი იქნება“, განაცხადა ინჯემ და დაამატა, რომ იგი თურქეთში საგანგებო მდგომარეობას არჩევიდან 48 საათში გააუქმებს. 

56 მილიონზე მეტი ამომრჩეველი იყო დარეგისტრირებული 180 000 საარჩევნო უბანზე მთელი თურქეთის გასწვრივ. ხმის მიცემა ადგილობრივი დროით დილის 8:00 საათზე დაიწყო და 17:00 საათზე დასრულდა.